УИХ-ын чуулганы нэгдсэн хуралдаанаар Төрийн албан хаагчийн ёс зүйн тухай хуулийг хэлэлцэж байна. 

Хэлэлцэж буй асуудалтай холбогдуулан УИХ-ын гишүүн Ц.Сэргэлэн "Төрийн албан хаагчид албан үүрэг гүйцэтгэж байхдаа архидан согтуурах, ямар нэгэн үйлдэл гаргахыг хуулиар хориглосон.  Тиймээс ёс зүйн асуудалд сахилгын шийтгэл хүлээлгэх төрөл оруулах хэрэгтэй. 

Төрийн албан хаагч албан үүрэг гүйцэтгэж байхдаа архидан согтуурвал тодорхой хугацаанд төрийн албанаас чөлөөлдөг болмоор байна. Төрийн байгууллагууд өөрийн гэсэн хуулиар хүлээсэн чиг үүрэгтэй.

Төрийн албанд архийг эгнэгт халах тухай асуудлыг л шийдэх хэрэгтэй. Өдөр тутамд зэвсэг тусгай хэрэгсэлтэй харьцаж байдаг төрийн тусгай байгууллагуудын тухайд хэцүү асуудал. Хална гэдэг үгийг хуульчилж өгөх ёстой.

Мансуурсан, хэлээ хазсан, далжганасан төрийн албан хаагчаар иргэд асуудлаа шийдүүлнэ гэж байхгүй. Тиймээс тэднийг шууд халдаг болох хэрэгтэй. Үйлдлээ ухамсарлах гэдэг үүднээс нэг жилийн хугацаад төрийн албан хаагч архинаас гараад эргээд ажилдаа орж болдог, ноцтой гэж үзвэл шууд халдаг баймаар байна" хэмээв. 

Харин УИХ-ын гишүүн Б.Баттөмөр "Хуулийн төсөлд төрийн албан хаагчдад тавигдах ёс зүйн нийтлэг шаардлага гэж байгаа. Албан үүргээ гүйцэтгэж байхдаа ажлын байранд согтууруулах ундаа хэрэглэх, олон нийтийн газарт мөрдөх дэг журмыг зөрчих гэсэн заалтыг оруулж өгч байгаа.

Бид судалгаа сайн хийсэн. Тэгэхээр энэ заалтыг ёс зүйн хуульд оруулж өгч байгаа. Халахтай холбоотой заалт орсон. Архи ууж согтуурахаас гадна ёс зүйн олон зөрчлийг давтаж гаргасан бол халах юм" гэв. 

Төрийн албан зөвлөлийн дарга Б.Баатарзориг "Төрийн албан хаагч архидан согтуурсан 98 зөрчил 2019 онд илэрсэн. Энэ үйлдлээр 2020 онд 37, 2021 онд 75, 2022 онд 153 зөрчил илэрсэн. Зөрчлийн нөхцөл байдлаас шалтгаалаад албан үүргээс нь халах хүртэл арга хэмжээг авсан" гэв.