Улаанбурхан, салхинцэцэг өвчний тархалт, вакцинжуулалт олон улсын нөхцөл байдлын талаар ХӨСҮТ-ийн ерөнхий захирал Ц.Билэгтсайхан болон холбогдох мэргэжилтнүүд өнөөдөр мэдээлэл өглөө. 

ХӨСҮТ-д 40 хүүхэд салхинцэцэг өвчнөөр эмчлэгдэж байна. Насны хувьд 0-5, 5-10, 5-25 насны хүмүүс байгаагаас дийлэнх нь 0-5 насныхан байна. Яаралтай тусламжийн тасгаар 2-3 тууралтат халдварын тохиолдол ирж, иргэд эмчилгээ үйлчилгээ авч байна. Үүнээс Салхинцэцэг өвчний халдварын тохиолдол их бүртгэгдэж байгааг ХӨСҮТ-ийн Яаралтай тусламжийн тасгийн эрхлэгч Б.Бурмаа онцоллоо. 

Үргэлжлүүлэн "Салхинцэцэг өвчний халдвар нь вирусийнх бөгөөд маш дэгдэмтгий учраас халдварлалт өндөр байдаг. Тиймд салхинцэцгийн халдварын хөнгөн, хүнд зэрэг аль ч хэлбэрээр өвдсөн эмнэлэгт тусгаарлагдан эмчлэх нь зүйтэй.

Уг өвчний халдвар амьсгалын замаар дамждаг. Халдварын урьтал үе дээрээ Улаан бурхан, Улаан эсэргэний халдварын тууралттай адилхан, халуурах шинж тэмдгээр өвөрмөц илэрдэг.

Тууралтын хувьд:

• Толбон тууралт
• Хөврүүн тууралт
• Цэврүүтэй тууралт байдлаар гардаг.

Тууралт нь толгой, хүзүү, нүүр, их бие гээд биеийн бүх хэсэгт нэгэн зэрэг тархаж гардаг. Хэрэв хүүхэд халуурч л байвал тухайн хүүхдэд шинэ тууралт гарч байна гэсэн үг. Хөнгөн бол 3-5 хоног, хүнд бол  6-10 хоног тууралт гардаг.

Салхинцэцгийн халдварын үеийн зөвлөгөө: 

• Усанд орох
• Агаар салхинд гарах /бусдад халдвар тараахгүй нөхцөлд/
• Гэртээ чийгтэй цэвэрлэгээ хийх 
• Хувийн ариун цэврээ сахих хэрэгтэй" гэлээ.