3х3 сагсан бөмбөгийн "Ulaanbaatar cup" тэмцээн дөрөвдүгээр сарын 22-нд эхлэх гэж байна. 

Оролцох багуудыг дөрөвдүгээр сарын 21-нээс бүртгэх юм. Тус тэмцээний зохион байгуулалтын талаар Монголын сагсан бөмбөгийн холбооны ерөнхий нарийн бичгийн дарга С.Төгсжаргал мэдээлэл өглөө. 

Тэрбээр "Монголын Сагсан Бөмбөгийн Холбоо, 3х3 Сагсан Бөмбөгийн Холбоо, Нийслэлийн Засаг Даргын Тамгын Газар хоорондоо харилцан ойлголцлын Санамж бичиг байгуулсан. Энэ хүрээнд "Ulaanbaatar cup 2023" 3х3 сагсан бөмбөгийн тэмцээн болно. 

Дөрөвдүгээр сарын 22-ноос эхлэн амралтын өдрүүдээр есөн дүүргийн аварга шалгаруулах тэмцээн, тавдугаар сарын 21-нд аваргын төлөөх тоглолтууд болох юм.

Аварга баг нь ирэх долдугаар сард болох Олон Улсын Сагсан Бөмбөгийн Холбооны их дуулгад оролцох эрхээ авна. Тиймээс хүүхэд залуучууд та бүхнийг тус тэмцээнд оролцохыг урьж байна" гэлээ.

"Ulaanbaatar cup" нь эрэгтэй, эмэгтэй насанд хүрэгчдийн ангиллаар зохион байгуулагдана. Мөн 17-18 настнууд ч оролцох боломжтойг зохион байгуулагчид мэдэгдэв. Уг тэмцээнийг сагсан бөмбөгийн холбоод болон НЗДТГ хамтран зохион байгуулж байна.