Шувуу ажиллагааны талаар Хууль зүй, дотоод хэргийн сайд Х.Нямбаатар мэдээллэх үеэр гадаадын хөрөнгө оруулгагчдын эрх ашгийг хамгаалахтай холбоотой асуудлыг тодрууллаа. 

Тэрбээр "Монголчууд бизнес хийвэл тохиролцоондоо шударга байдаг гэдэг дүр төрхийг эргүүлж авч ирэхгүй бол цаашид хөрөнгө оруулалт хийх эрх зүйн орчин хүндэрнэ.

Хоёрдугаарт, гаднын хөрөнгө оруулалтгүйгээр хөгжсөн улс орныг би сонсоогүй. Тиймээс энэ чиглэлд тууштай ажиллана.

Удахгүй Баянгол дүүргийн шүүхэд Хьюндай эмнэлэгтэй холбоотой хэрэг шийдэгдэх гэж байгааг сонссон. Мөн Чингэлтэй дүүргийн шүүхээс Английн бизнесмэн Макс Жонсонтой холбоотой хэрэг шийдэгдээд, нэмэлт ажиллагаа хийгдэхээр Мөрдөн шалгах албанд ирсэн. Удахгүй энэ хэрэг шүүхэд шилжиж, нэг талдаа гарна.

Энэ мэтчилэн гадны хөрөнгө оруулагчдын 50 гаруй гомдлоос найм нь шийдэгдээгүй. 40 гаруй нь прокурор, шүүхийн шатанд шилжсэн. Эрүүгийн цагдаа дээр гадаадын хөрөнгө оруулагчдын эрх ашгийг хохироосон, хөндсөн асуудлаар тусгай дугаарын утас ажиллуулж байгаа" хэмээв.