Японы Ерөнхий сайд Фүмио Кишидаг өнөөдөр Вакаяма хотод үг хэлж байх үеэр бөмбөг дэлбэрсэн байна. Тухайн үед хүчтэй дэлбэрэлт сонсогдож утаа дэгдсэн бөгөөд Ерөнхий сайдыг яаралтай нүүлгэн шилжүүлжээ. 

Japan Times сайтад гар хийцийн тэсрэх бөмбөг эсвэл утаа гаргагч байсан байж болзошгүй гэж мэдээлсэн байна. Дэлбэрэлт сонсогдсоны дараа хүмүүс зугтаж гүйлдэцгээж байгаа нь бичлэгт үлджээ.

Энэ үеэр хамгаалалтын албаныхан ерөнхий сайдыг аюулгүй газарт шилжүүлж, халдлага үйлдсэн сэжигтнийг баривчилжээ. Баривчлагдсан этгээд 24 настай Рюжи Кимура гэгч байсныг сүүлд эрх баригчид мэдээлсэн юм. Одоогоор халдлага үйлдэх болсон шалтгаан, зорилго тодорхойгүй байна.

Ерөнхий сайд сүүлд арга хэмжээгээ өөр газарт үргэлжлүүлжээ. Тэрбээр, “Цагдаа нар болсон явдлыг шалгаж байгаа. Олон хүнийг айлгаж, санааг нь зовоосондоо би уучлал гуйж байна” гэж хэлсэн байна.

Кишидагийн Либерал Ардчилсан Намын төлөөлөгч Хироши Морияма “Ардчиллын үндэс болсон сонгуулийн кампанит ажлын дундуур ийм зүйл болсонд харамсаж байна. Энэ бол уучилж болшгүй харгис үйлдэл юм” гэж мэдэгджээ.

Японы нийгэмд зэвсэгт халдлага маш ховор гардаг. Гэхдээ өнгөрсөн оны зун ерөнхий сайд асан Абэ Шинзогийн амийг бүрэлгэсэн аллагын дараа тус улсын эрх баригчид улс төрчдийн аюулгүй байдалд нэлээд анхаарах болсон юм. Абэ Шинзог ч мөн гар хийцийн буугаар буудсан.