УБТЗ  Олон улсын "Гармын мэдлэг дээшлүүлэх өдөр"-ийг угтан "Төмөр замын гармын аюулгүй байдал" сэдэвт зөвлөгөөн зохион байгууллаа. Зөвлөгөөнд ЗТХЯ, Тээврийн прокурорын газар, Төмөр замын цагдаагийн газрын төлөөллүүд оролцож, илтгэл хэлэлцүүлэн оролцогчдод мэдээлэл өглөө.

УБТЗ ХНН-ийн хувьд 2011 онд “Олон улсын төмөр замуудын холбоо”-нд нэгдсэн бөгөөд тус холбооноос зохион байгуулдаг “Гармын мэдлэг дээшлүүлэх олон улсын өдөр”-ийг 2013 онд “Зогс! Галт тэрэгнээс болгоомжил” уриатайгаар анх тэмдэглэж байв. Тэгвэл энэ жил "Түр зогс, Бүү яар" уриатайгаар 11 дэх жилдээ тэмдэглэх гэж байна. “Гармын мэдлэг дээшлүүлэх олон улсын өдөр” нь гармын техникийн байдлыг сайжруулах, иргэд олон нийтэд гармын тухай ойлголтыг түгээн дэлгэрүүлэхэд ихээхэн чухал арга хэмжээ юм.

Зөвлөгөөний үеэр УБТЗ   ХНН “Гармын мэдлэг дээшлүүлэх олон улсын өдөр”-ийг угтан төмөр замын гарам дээр гарч болзошгүй осол, зөрчлийг бууруулах зорилгоор Монгол Улсын хэмжээнд “ТҮР ЗОГС, БҮҮ ЯАР” нөлөөллийн аян эхлүүлж буйг албан ёсоор зарлалаа. Хайртай хүмүүстээ очихын тулд “ТҮР ЗОГС, БҮҮ ЯАР!”