Герман улс өчигдөр сүүлчийн гурван реактораа унтрааснаар өөрийн цөмийн эрчим хүчний салбараа бүр мөсөн хаалаа.

Өрнөдийн олон орон агаар дахь хүлэмжийн хийг бууруулах зорилгоор цөмийн эрчим хүчний хөрөнгө оруулалтаа нэмэгдүүлж байгаа бол Герман улс эсрэгээрээ үүнээс татгалзаж байна.

Европын хамгийн том эдийн засагтай тус улсад бүр 2002 оноос эхлэн цөмийн эрчим хүчнээс татгалзах талаар ярьж эхэлсэн юм.

2011 онд Японд болсон Фүкүшимагийн цөмийн гамшгийн дараа цөмийн эрчим хүчнээс татгалзах ажил улам түргэссэн байна.

Гэвч өнгөрсөн оны эхээр Украинд эхэлсэн Оросын эзлэн түрэмгийлэх дайны улмаас эрчим хүчний хямрал үүссэн нь Германы засгийн газрын төлөвлөгөөг хэрэгжихэд саад учруулсан юм.

Анхны төлөвлөгөө ёсоор Герман улс 2022 оны сүүлээр цөмийн эрчим хүчнээс татгалзах байжээ. Гэхдээ эрх баригчид Оросын байгалийн хийн хангамжаас хамааралгүй болж чадсан тул ийнхүү төлөвлөгөөгөө бага зэрэг хойшлуулсан ч амжилттай хэрэгжүүлж байна.

Greenpeace байгууллага өчигдөр Берлин хотын Бранденбургийн хаалганы дэргэд энэ үйл явдлыг тэмдэглэжээ.

“Эцсийн эцэст цөмийн эрчим хүч түүх болон үлдлээ. Дөрөвдүгээр сарын 15-ныг санан дурсах өдөр болгоцгооё” гэж тус байгууллагаас мэдэгдсэн байна.

Өчигдөр унтраасан гурван реактор нийлээд Германы нийт эрчим хүчний 6 орчим хувийг үйлдвэрлэдэг байжээ. 1997 онд оргил үедээ цөмийн салбар нийт үйлдвэрлэлийн 30.8 хувийг хангадаг байв.

Засгийн газар шингэрүүлсэн хийн дэд бүтцийг бий болгож, хийн хангалттай нөөцтэй болж, эрчим хүчний асуудлыг хяналтдаа авсан тул цаашид цөмийн станцууд хэрэггүй болж буйг тус улсын эдийн засгийн сайд Роберт Хабек өчигдөр мэдэгджээ.

Герман улсын эрх баригчид 2030 он гэхэд нийт эрчим хүчнийхээ 80 хувийг сэргээгдэх эх үүсвэрээс хангадаг болохыг зорьж байна.

Энэ зорилгод хүрэхийн тулд ойрын жилүүдэд өдөр бүр 4-5 салхин сэнсний турбин угсрах төлөвлөгөөг канцлер Олаф Шольц саяхан зарлаж байв. Өнгөрсөн онд Германд 551 турбин босгосон байна.

 

Эх сурвалж: AFP