"Цахилгаан шат уу? Эрүүл мэндийн явган шат уу?" алхалтын зөвлөгөө өгөх өдөр болж өнгөрлөө.

Орон даяар "Цаг гаргая" үндэсний арга хэмжээ зохион байгуулж буй билээ. Энэ хүрээнд Монголын явган алхалтын холбооны гишүүд сайн дурын, сонирхолтой хөтөлбөрийг өчигдөр хэрэгжүүллээ. Тэд цахилгаан шат хүлээж буй иргэдэд зориулж явган алхалтын ач холбогдлын талаар товч мэдээлэл, нөхөрсөг зөвлөгөө өгсөн байна.

Монголын Явган Алхалтын Холбооны гишүүд оффис, орон сууц, дэлгүүр, үйлчилгээний төвүүдээр зочлон явган алхах сэдэл өгсөнд хүн бүр таатай хандсан байна.

Оффисын ажил эрхэлдэг хүмүүс өдөрт дунджаар 10-15 минутыг цахилгаан шат хүлээх, зорчиход зориулдаг гэсэн судалгаа бий. Мөн оффисын ажилчид ихэнх цагаа компьютерын өмнө ажиллаж, хөдөлгөөн багатай өнгөрүүлдэг. Үүнээс улбаалан хөдөлгөөний дутагдалд орох, хүзүү чилэх, нуруу хөших, гар бадайрах, суудлын өвчин тусах, илүүдэл жинтэй болох, хөдөлгөөний хомсдлын улмаас олон төрлийн өвчинд нэрвэгдэж болох суурь бүрддэг.

 

Ажлын байранд хамгийн энгийн, хялбар төдийгүй дасгал хөдөлгөөн дэмжих арга бол цахилгаан шатнаас аль болох татгалзаж, явган шат ашиглах юм.

Алхалтыг дэмжих 2х2 дүрэм: Бид дээшээ хоёр давхар өгсөх эсвэл доошоо хоёр шат буух бол лифт хүлээж цагаа үрэхийн оронд явган шатыг ашиглах нь эрүүл мэндэд тустай.

Эрүүл мэнддээ ч, экологи, эрчим хүчинд ч хэрэгтэй сонголт болно.

Хүний биеийн булчингийн 93 хувийг явган алхсанаар ажиллуулж, цусны эргэлтийг сайжруулж, ажлын бүтээмжээ нэмж, бүтээлч сэтгэлгээгээ өсгөж, бухимдлаа арилгах гээд олон давуу талтай.

Алхах нь хэнийг ч нас, хүйс, ур чадвар, чадал чансаа, ажил эрхлэлт, мэргэшил мэргэжлээр нь үл ялгаварлан, нэгтгэж чаддаг хүчирхэг үйлдэл юм.