Туул голын голдиролд зөвшөөрөлгүй шороо түрж далан үүсгэсэн гэх мэдээллийн дагуу БОАЖЯ-наас шийтгэлийн арга хэмжээ авч ажиллажээ.

Тодруулбал, БОАЖЯ-ны Салбарын хяналтын газарт дөрөвдүгээр сарын 14-ний өдөр Туул голын сав газрын захиргаанаас иргэний цахим хуудас дахь “Голын голдирол өөрчилж байна” гэх мэдээллийн дагуу шалгалт хийлгэх хүсэлтийг ирүүлжээ.

Уг мэдээллийн дагуу шалгахад Баянзүрх дүүргийн 26 дугаар хорооны нутаг дэвсгэрт байрлах Үндэсний цэцэрлэгт хүрээлэн дотор наран шарлагын зориулалтаар төсөл хэрэгжүүлэгч нэр бүхий компани Туул голын голдиролд холбогдох байгууллагын зөвшөөрөлгүй шороо түрж, далан үүсгэсэн зөрчил илэрсэн байна.

Иймд БОАЖЯ-наас Зөрчлийг хялбаршуулсан журмаар шийдвэрлэж, тус компанийг 3,000,000 төгрөгөөр торгон зөрчлийг арилгатал үйл ажиллагааг нь түр зогсоосон болохыг мэдээллээ.