Японы жүдо бөхийн шигшээ баг ирэх сард Катарын Дохад болох ДАШТ-ийн бэлтгэлдээ гараад байна. Хамгийн хүнд буюу +100 кг жингийн Сайто Тацүри бэлтгэлийн үеэр сэтгүүлчдэд тус тэмцээний талаар ярилаа.

Өнгөрсөн жил анх удаагаа ДАШТ-д зодоглохдоо Сайто Кубын Эндо Грандад финалд ялагдаж, мөнгөн медальтай үлдсэн билээ.

Тэрбээр, “Өнгөрсөн жилийн тэмцээнээр дэлхийд түрүүлчихвэл аав Сайто Хитошитойгоо ижил дэлхийн аварга болно гэж хэт их бодчихсон байсан. Энэ удаад аавынхаа талаар огт бодолгүй, өөртөө л анхаарал хандуулж барилдах болно. Дэлхийн аварга болоход 2024 оны Парисын олимпын шигшээ багт бараг багтах тул маш чухал тэмцээн. Амь насаа тавиад ч хамаагүй заавал түрүүлэх ёстой тэмцээн.

Өнгөрсөн жилийн Мастерс тэмцээний үеэр 174 кг байсан бол жин хасаад 167 кг боллоо. Ингэснээр нуруу, өвдгөнд ирэх ачаалал буурсан. Өнгөрсөн сар манай клубт болсон хамтарсан бэлтгэл дээр Францын Тедди Ринертэй хэд хэд барилдлаа.

Тедди жинхэнэ чадлаа гаргаагүй байж мэдэх ч миний хувьд “Ялахын аргагүй тасарчихсан тамирчин” гэж хэлэхээр ялгаа алга гэж бодсон. Ринерийг заавал давж гарах хүсэлтэй. Барилдааны агуулга ямар байх нь үнэнийг хэлэхэд надад хамаа алга. Ялж, түрүүлж л байвал болно” гэлээ.