Өргөн нэвтрүүлгийн тухай хуулийн дагуу айл өрхүүд сар бүр 2,500 төгрөг төлж байгаа.

Энэхүү мөнгийг өргөн нэвтрүүлгийн телевизүүдийн заавал гишүүнчлэлтэй, нийтийн эрх зүйн хуулийн этгээд болох Монголын Телевизүүдийн Холбоо(МТХ) төвлөрүүлж, өргөн нэвтрүүлгийн телевизийн үзэлтийн судалгааг үндэслэн гишүүдэд хуваарилна хэмээн уг хуулийн 20.6-д заасан.

Тэгвэл уг заалт болон бусад асуудал нь Үндсэн хуулийн холбогдох заалтыг зөрчиж байна гэж үзэн сэтгүүлч Б.Пүрэв, Глоб Интернэшнл төвийн хуульч Б.Пүрэвсүрэн нар Үндсэн Хуулийн Цэц(ҮХЦ)-д ханджээ. 

МТХ-нд 18 телевиз гишүүнчлэлтэй байна. 

Хуульч Б.Пүрэвсүрэн "Айл өрх сар бүр 2,500 төгрөг төлж байгаа. Албан байгууллагууд ч тэр. Өргөн нэвтрүүлгийн тухай хуулийн 20 дугаар зүйлийн 20.5.3, 20 дугаар зүйлийн зургаа дахь хэсэг болон 26 дугаар зүйлийн 7 дахь хэсгүүд нь Үндсэн хуулийн холбогдох заалтыг зөрчиж байна. Энгийнээр хэлбэл, 2-19 дүгээр сувгийг 18 телевиз өөрсдөө эзэлдэг. Зах зээлийн нийгэмд энэ нь байж боломгүй үзэгдэл бөгөөд шударгаар өрсөлдөх зарчим хөндөгдөж байна. Мөн "Нийтийн эрх зүйн хуулийн этгээд" гэх байгууллага гэнэт байгуулагдсан. 

Эдгээр нь Үндсэн хуулийн 14 дүгээр зүйлийн нэг, 5 дугаар зүйлийн 2, 17 дугаар зүйлийн 3 дахь зүйлийг зөрчиж байна гэж үзэж байгаа" гэв. 

Сэтгүүлч Б.Пүрэв "Энэ бол хэвлэлийн эрх чөлөөний эсрэг гэж үзэж байгаа. Учир нь заавал гишүүнчлэлтэй байх ёстой гэж заасан. Гэтэл хэвлэлийн эрх чөлөөнд ийм зүйлийг хориглодог. Мөн төрийн бүх байгууллага бүгд дэргэдээ хэвлэлийн алба, студитэй болчихсон. Тэд хэвлэлийн мэдээг өөрсдөө бэлтгэж, 18 телевиздээ бүгдэд нь явуулдаг. Бүгд адил мэдээлэл гаргадаг. Мэдээллийн урсгал гээд КОВИД-19-ийн үед найман телевиз бүгд адилхан мэдээлэл гаргасан. Үүнийг хэвлэлийн салбарын мэргэжилтнүүд маш их шүүмжилсэн.

2020 оны долдугаар сарын 1-нээс хэрэгжиж эхэлсэн хуулийн асуудлаар одоо цэцэд хандаж байгаа учир нь ямар үр дүн гаргахыг хүлээсэн. Гэтэл энэ хоёр жилийн хугацаанд нэг ч удаа МТХ тайлан гаргаагүй. Нэг ч аудитын дүгнэлт байхгүй. Олон нийтийн мэдэх эрхийг хангасан уу, реклам сурталчилгаагаа багасгасан уу, хүүхдийн эрх, гэмт хэрэг зөрчилтэй тэмцэх мэдээлэл, үйл ажиллагаа явуулсан уу гэдгийг та бүхэн бодоод үзээрэй" гэлээ.