Нийслэлийн долоон дүүргийн 205 өрхийн эмч, сувилагч, ажилтны төлөөлөл ЭМЯ-ны гадна жагсаж, дутуу олгосон гүйцэтгэлийн санхүүжилтээ нэхэж, эсэргүүцлээ илэрхийлсэн. Бид төрөөс халамж  тэтгэмж гуйгаагүй хийсэн ажлынхаа л хөлсийг авах гэлээ. Шийдэж өгөхгүй бол тэмцлийн дараагийн аргад шилжинэ гэж байв. Харин энэ асуудалд Эрүүл мэндийн сайд С.Чинзориг хариу өглөө. Тэрбээр “Миний хувьд ажлаа авангуутаа ӨЭМТ-үүдийн санхүүжилттэй холбоотой асуудлаар мэдээлэл авсан. Санхүүжилтийн 80 хувийг нь олгосон. Одоо үлдэгдэл 20 хувийг олгоогүй байгаа юм билээ. Бид өнөө маргаашгүй ӨЭМТ-үүдийн төлөөлөлтэй уулзаж, шийдэх талаар ярилцана. Урьдчилж авсан мэдээллээр, Эрүүл мэндийн даатгалын ерөнхий газрын программ хангамжид нь асуудал байгаа юм билээ. ӨЭМТ-үүдийн эмчилгээ үзүүлсэн гүйцэтгэлийг программд шивэхдээ буруу уншсан, буруу ангиллаар шивж оруулсан байна. Үүнтэй холбоотойгоор санхүүжилт дутуу гарсан гэх ойлголтыг авсан. Тиймээс программыг засаж, сайжруулж ЭМДЕГ, ӨЭМТ-үүдийн тооцоо нийлүүлж, асуудлыг яаралтай  шийднэ” гэлээ.