Итали улсын засгийн газар аялал жуулчлалын шинэ кампанит ажилдаа 15 дугаар зууны сонгодог уран зургийн гол дүр, хайрын бурхан Венераг хиймэл оюуны технологийн тусламжтай “виртуал инфлүнсер” болгон ашиглажээ.

Өөрөөр хэлбэл сэргэн мандалтын үеийн гол уран бүтээлчдийн нэг Сандро Боттичеллигийн зурсан Венера дагина орчин үеийн Италид амьдарч байгаагаар аялал жуулчлалын сурталчилгаануудад ашигласан байна.

Брэнд хувцас өмссөн Венера байгалийн үзэсгэлэнт газруудаар аялж, Гэгээн Маркогийн талбайд сэлфи хийж, Колоссейн урд дугуй жийж, Комо нуурын эрэгт пицца зооглож байгааг эндээс харж болох юм.

“Орчин үеийн инфлүнсерийн дүрд хувирсан Венера дагина гадаадын зочдыг манай улстай танилцахад хөтлөх болно. Манай орны гоо үзэсгэлэнг хүүрнэн өгүүлэх Боттичеллигийн гайхамшигт Венера дагиныг бид Италийн хамгийн алдартай хотуудаас эхлээд хамгийн далд нууцлаг газруудад хүртэл угтан авч байна” гэж Италийн аялал жуулчлалын яамны мэдэгдэлд өгүүлжээ.

Шинэ инфлүнсерийн Инстаграм хаяг @venereitalia23 юм байна.

Эх сурвалж: CNN