3х3 сагсан бөмбөгийн дэлхийн цуврал тэмцээн Манилагийн их дуулгын эрх олгох "Ulaanbaatar Super Quest 2023" тэмцээн UG Arena-д боллоо.

Нийт 12 баг оролцсон тэмцээний зургаа нь талбайн эзэн буюу Монгол улсын багууд байсан боловч тэдний аль нь ч их дуулгын эрх авч чадсангүй.

Тэмцээний финалд шалгарсан хоёр баг Филиппиний нийслэл Манилаг зорих байв. Монголын багуудаас хамгийн өндөр чансаатай, Азийн шилдэг тоглогч Д.Дэлгэрням тэргүүтэй "Ulaanbaatar MMC Energy" баг хагас шигшээд Японы "Utsunomiya BREX"-т 17-21 онооны харьцаагаар хожигдсон. Харин Азийн аварга О.Энхбаатар, А.Ананд нарын "Sansar MMC Energy" баг Хятадын "Futian"-д 15-18 гэсэн оноогоор хожигдож тэмцээнээ дуусгалаа.

"Ulaanbaatar MMC Energy" болон "Sansar MMC Energy" багууд таван өдрийн дараа дэлхийн цувралын нээлтийн тэмцээн болох "Utsunomiya 2023" их дуулгад оролцоно. Финалд шалгарсан "Utsunomiya BREX" мөн тус тэмцээнд оролцох эрх аваад байгаа билээ.