Дархан хотноо "Өөрийгөө Ялах" бүх нийтийн гүйлтийн тэмцээнийг Дархан-Уул аймгийн БТСГ, Шри Чинмойн марафоны баг хамтран энэ сарын 22-д зохион байгууллаа. Тус тэмцээн нь 16 дахь жилдээ зохиогдож байгаа улсын чанартай томоохон марафон гүйлт бөгөөд хүн амын эрүүл мэндийг хамгаалах, бүх нийтийн гүйлтийн спортыг хөгжүүлэхэд хувь нэмэр оруулах зорилготой билээ.

Марафоны 4 км-ийн зайн ангилалд насны хувьд 17-оос доош, 18-49, 50-59, 60 аас дээш гэсэн дөрвөн насны ангилалаар, 21 км-ийг 50-аас доош ба 50-аас дээш гэсэн хоёр насны ангиллаар ялагчийг шалгарууллаа.

Тэмцээнд Улаанбаатар, Увс, Ховд, Сэлэнгэ, Булган, Дархан-Уул, Баянхонгор, Орхон аймгийн нийт 150 гаруй гүйгчид оролцжээ. Сонирхуулахад тэмцээний хамгийн залуу оролцогч 11 настай, хамгийн ахмад гүйгч 72 настай буурай байлаа. Тэмцээний явцад гүйгчдийн аюулгүй байдлыг хангаж аймгийн ЗЦГ, ЭМГ-ууд хамтран ажилласан байна.