Бүгд Найрамдах Польш Улсын ерөнхийлөгч А.Дуда манай улсад өнөөдөр ирнэ.

Айлчлал дөрөвдүгээр сарын 26-ныг дуустал үргэлжлэх бөгөөд энэ үеэр хоёр улс эдийн засаг, бизнесийн хамтын ажиллагаагаа шинэ шатанд гаргахыг талууд зорьж байна. Монгол болон Польш улсын худалдааны эргэлт 2018-2020 онд 57.3-64.8 сая ам.доллар байсан бол өнгөрсөн хоёр жилийн хугацаанд уг хэмжээ бараг хоёр дахин өсөж, 98.3 сая ам.доллар болсон нь хоёр улсын эдийн засаг, бизнесийн харилцан ашигтай хамтын ажиллагаа цаашид ч өргөжих боломжтойг илтгэж байгаа юм.

Хүснэгт, худалдааны харилцаа, ам.доллароор

он	2018	2019	2020	2021	2022
Экспорт	268,000	490,000	436,000	1.02 сая	600,000
Импорт	58 сая	64.4 сая	56.6 сая	83.3 сая	97.7 сая
Эрэлт	58.2 сая	64.8 сая	57.3 сая	84.3 сая	98.3 сая

 

Монгол, Польш хоёр улс 1950 онд дипломат харилцаа тогтоосноос хойш олон талаар хамтарч ажиллаж буй бөгөөд ялангуяа геологи, уул уурхайн хайгуул, аж үйлдвэрийн салбарт хамтын ажиллагааны туршлага арвин билээ.

1990 оноос өмнө Польшийн зээл, тусламжаар Монголд байгуулсан үйлдвэр:

1. Дарханы царууц тоосго, шохойн үйлдвэр (1966 он)
2. Улаанбаатарын Хөнгөн бетоны үйлдвэр (1966 он)
3. Хархорины дулааны цахилгаан станц (1970 он)
4. Улаанбаатарын мод боловсруулах комбинат (1971 он)
5. Улаанбаатарын Халиман цавууны цех (1975 он)
6. Улаанбаатарын Нэхээсгүй эдлэлийн үйлдвэр (1989 он)
7. Улаанбаатарын спиртийн үйлдвэр (1974 он)
8. Хархорины спиртийн үйлдвэр (1974 он)
9. Чойбалсангийн царууц тоосгоны үйлдвэр (1985 он)

1961-1965 онд Польшийн түүхэнд хамгийн том буюу 190 хүнтэй геологийн экспедиц байгуулагдан Монголын баруун аймгуудын нутагт геологийн судалгаа, эрэл хайгуул хийж байжээ. Тухайлбал,1962-1964 онд Монгол Алтайд Е.Рутковскийн удирдсан экспедиц, 1960-аад оны сүүлийн хагаст Вроцлавын геологичид, 1970, 80-аад онд олон улсын экспедицүүдийн бүрэлдэхүүнд геологийн судалгаа үргэлжилж, 1984 оноос Монгол-Польшийн хамтарсан экспедиц байгуулагдан Лугийн гол, Мушгиа худагт газрын ховор элементийн хайгуул хийж байв.

1963-1971 онд Варшавын их сургуулийн профессор Зофиа Келан-Яворовскагийн удирдсан Польш-Монголын палеонтологийн хамтарсан экспедиц ажиллаж, том нээлтүүд хийж, 100 шахам олдворууд олсон. Варшав дахь палеонтологийн музей баялаг үзмэртэй бөгөөд Монголоос авчирсан үзмэрүүд чухал байр суурь эзэлдэг байна.