ОБЕГ-ын дэд дарга, бригадын генерал Б.Ууганбаярын ахалсан ОБЕГ-ын дэргэдэх Үндэсний аврах бригад болон Зэвсэгт хүчний жанжин штабын алба хаагчдаас бүрдсэн Эрэн хайх, аврах бүлгийн баг /2023.02.08/ Турк улсыг зорьж, газар хөдлөлтийн голомтод 14 хоног үүрэг гүйцэтгэсэн. Тэгвэл өчигдөр /2023.04.25/ Турк улсын Төрийн дээд шагнал болох "Дээд зүтгэлийн медал"-аар Б.Ууганбаярыг шагнажээ. Уг нэр шагналыг БНТУ-ын дэд ерөнхийлөгч Фуат Октайн гардуулан өгчээ. Генерал Б.Ууганбаяр маргааш эх орондоо ирэх юм.

Монголын аврах баг үүрэг гүйцэтгэх 10 хоногийн хугацаанд нуранги дундаас найман хүний эрдэнэт амийг авран 19 хүний шарилыг ар гэрийнхэнд нь хүлээлгэн өгч, 600 гаруй хүнд эмнэлгийн яаралтай тусламж үзүүлсэн байна. Мөн Монгол Улсын Засгийн газраас шийдвэрлэсэн 1500 ноосон хөнжил, 10 тонн махан нөөш, хоёр тонн лаа бусад хүмүүнлэгийн тусламж хүргэх юм. Мөн иргэдийн хандиваар монгол гэр бэлэглэсэн билээ.

Аврах багийн бүрэлдэхүүн нь 5-10 түүнээс дээш жилийн туршлагатай, гадаад улс орнуудад аврах ажиллагаанд оролцож байсан, англи болон турк хэлтэй алба хаагчдаас бүрджээ. Тэдгээрээс хоёр нь эмэгтэй алба хаагч юм. Мөн Монгол Улсын аврагчдын багт үнэрч хоёр нохой багтсан.