УИХ-ын чуулганы өнөөдрийн /2023.04.27/ хуралдаанд УИХ-ын гишүүн Хасуурын Ганхуяг Монгол Улсын Засгийн газраас 2022 оны арваннэгдүгээр сарын 28-ны өдөр УИХ-д өргөн мэдүүлсэн Аялал жуулчлалын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн анхны хэлэлцүүлэг дөрөвдүгээр сарын 25-ны өдөр хийсэн талаарх Эдийн засгийн байнгын хорооны санал дүгнэлтийг танилцуусан.

Байнгын хорооны хуралдаанаар хэлэлцүүлэг явуулах үед Ажлын хэсэг төслийн талаарх нийт 93 зарчмын зөрөөтэй саналын томьёолол бэлтгэж, зарчмын зөрүүтэй санал нэг бүрээр санал хураалт явуулахад гишүүдийн олонх зарчмын зөрүүтэй саналуудын ихэнхийг дэмжсэн байна.

Хэлэлцүүлэгтэй холбогдуулан гишүүнд асуулт асууж хариулт авсан бөгөөд хуулийн төсөлд гишүүд шүүмжлэлтэй хандсан юм. УИХ-ын дарга Г.Занданшатар 33 зүйлтэй хууль дээр 96 зарчмын зөрүүтэй санал хураагдаж хуулийн чинь чанарыг харуулж байна. Хуулиа чанартай оруулж ирэхийг анхааруулан завсарлага өгсөн юм.

УИХ-ын гишүүн П.Анужин:

"Аялал жуулчлалын тухай хуулийн шинэчилсэн найруулга гээд 33 зүйлтэй хууль байна. Өнөөдөр бараг 90 гаруй зарчмын зөрүүтэй санал хураана гэж байгаа. 33 зүйлтэй хуулинд 90 гаруй зарчмын зөрүүтэй санал оруулж ирэхээр энэ хууль чинь үлдэж байгаа юм уу! Үүнийгээ Ажлын хэсэг нь  татаж, цэгцэлж оруулж ирэхгүй юм уу?

Ямар учиртай зарчмын зөрүүтэй санал юм бэ. 70 орчим нь үндсэн хуультайгаа холбоотой, 20 орчим нь дагалдах хуультайгаа холбоотой юм байна. Гэхдээ ийм хууль байж болдог юм уу?" гэсэн асуултад УИХ-ын гишүүн Хасуурын Ганхуягийн хариулт, 

Тэрбээр "зарчмын зөрүүтэй олон санал гарсан. Гэхдээ энэ бол яаралтай горимоор Засгийн газраас өргөн барихдаа зарим зүйлийг орхигдуулсан, дутуу дулимаг зүйл гарсан. Тиймээс Ажлын хэсэг дээр Төрийн захиргааны төв байгууллагаас мэдээллүүд нэмж аваад, судалгаа хийлгэсэн. Тийм ч учраас үүн дээр зарчмын зөрүүтэй саналууд орж ирсэн. Хууль санаачлагчид буцааж болно. Гэхдээ асуудал нь нэн яаралтай горимоор орж ирсэн буюу Засгийн газар “аялал жуулчлалын жил” гээд зарлачихсан, хууль нь батлагдаагүй байгаа" гэв.