Өнөөдөр  “Эрдэнэс Тавантолгой” ХК-ийн Хувьцаа эзэмшигчдийн ээлжит хурал Соёлын төв өргөөний байранд болно. Хурлаар зургаан асуудал хэлэлцэн, шийдвэрлэхээс ногдол ашигтай холбоотой шийдвэр анхаарал татаж буй. Хурлаар дараах асуудлуудаг хэлэлцэх юм.

• Компанийн 2022 оны үйл ажиллагааны тайлангийн талаарх Төлөөлөн удирдах зөвлөлийн дүгнэлтийг хэлэлцэж батлах тухай;
• Компанийн 2022 оны аудитлагдсан санхүүгийн тайлангийн талаарх Төлөөлөн удирдах зөвлөлийн гаргасан дүгнэлтийг хэлэлцэж батлах тухай;
• Ногдол ашгийн талаар гаргасан Төлөөлөн удирдах зөвлөлийн шийдвэрийн танилцуулга;
• Компанийн дүрэмд нэмэлт, өөрчлөлт оруулах тухай;
• ТУЗ-ийн ердийн болон хараат бус гишүүдийг сонгох тухай;
• Компанийн дунд хугацааны төлөвлөгөөний танилцуулга гэсэн асуудлуудыг хэлэлцэн, шийдвэрлэнэ.

Тодруулбал, Монгол Улсын Засгийн газрын 2012 оны 181 дүгээр тогтоолд “Эрдэнэс Тавантолгой” ХК-ийн хувьцааг үнэ төлбөргүй эзэмшсэн иргэд, нэрлэсэн үнээр худалдаж авсан аж ахуй нэгжүүдийн хувьцаа нь хоёрдахь зах зээлийн арилжаа эхлэх хүртэл саналын эрхгүй, тэдгээрийг аливаа хэлбэрээр захиран зарцуулахгүй байхаар заасан байдаг.

Өнөөдөр болох хурлаар Засгийн газрын бодлогын хүрээнд шийдвэр гарах юм. Ногдол ашгийн тухайд ТУЗ-ийн 10 гишүүний гаргасан шийдвэрийг хэлэлцэнэ. Компанийн өнгөрсөн жилийн ашиг болох 1.3 их наяд төгрөгийг ногдол ашиг болгон тараах уу, эсвэл ирэх оны долдугаар сард ашиглалтад оруулахаар төлөвлөгдсөн нүүрс угаах үйлдвэрийн бүтээн байгуулалтад зарцуулах уу гэдгийг ТУЗ-аас урьдчилсан байдлаар шийдвэрлэж, саналаа оруулж ирэх ёстой.