Монголбанкны Ерөнхийлөгч Бядраны Лхагвасүрэн шүүгчид хандан, хилийн хоригоо цуцлуулах хүсэлт тавьсан байна. Тэрбээр хүсэлтдээ “Шүүх хуралд байнга оролцож, шүүхийн тасралтгүй үйл ажиллагааг хангах үүднээс өмгөөлөгчөөрөө болон өөрөө биечлэн мэдүүлэг өгч байна. Одоо гүйцэтгэж буй ажлын шаардлагаар Монгол Улсыг төлөөлөн томоохон төсөл хөтөлбөр, яриа хэлэлцээрийн уулзалтад биеэр оролцох, байр суурь илэрхийлэх зайлшгүй шаардлагатай.

Сангийн сайд, Төв банкны Ерөнхийлөгч нар улсаа төлөөлөн оролцох шаардлагатай. Энэ сарын эхээр болсон, ОУВС-гийн хуралд оролцож чадаагүй. Дараа долоо хоногт АХБ-ны хурал болно. Хөгжлийн түншүүдийн зүгээс үл тоосон, хайхрамжгүй хандсан мэт сэтгэгдэл төрүүлж байгааг ойлгож, үүнийг харгалзан хилийн хоригоос чөлөөлж өгнө үү. Миний эзгүйд өмгөөлөгч миний өмнөөс шүүх хуралдаанд оролцоно. Өмгөөлөгчдөө итгэж байна ” гэжээ.

Хөгжлийн банкны гэх хэргүүдийг шүүж буй хуралдаан даргалагч “Энэ хэргийн бүх оролцогч, шүүгчдэд Монгол Улсын хилээр гарахыг хориглосон. Энэ шийдвэр бүх хүнд тэгш үйлчилнэ. Хэрэг хянан шийдэх ажиллагаа тасралтгүй үргэлжилнэ ” гэв.

Төв банкны Ерөнхийлөгч Б.Лхагвасүрэнг эрх мэдэл, албан тушаалаа урвуулан ашиглах хэрэгт холбогдуулан шалгаж байна. Тэрбээр 2013 онд Хөгжлийн банкны Төлөөлөн удирдах зөвлөлийн хараат бус гишүүнээр ажиллаж байхдаа "Бэрэн" группийн зээлийн хуралд оролцож байжээ.