Жүдо бөхийн ДАШТ энэ тавдугаар сарын 7-ноос 14-ний өдрүүдэд Катар улсын Доха хотноо ганцаарчилсан болон багийн төрлүүдээр болох юм. Энэ удаагийн тэмцээнд таван тивийн 99 орны 667 тамирчин оролцохоор мэдүүлгээ өгөөд байна. Хамгийн анхаарал татсан нь Орос, Беларусийн тамирчид IJF буюу Олон улсын жүдогийн холбооны далбаан дор зодоглоно.

УКРАИН БОЙКОТ ЗАРЛАВ

Орос, Беларусын тамирчдыг ДАШТ-д оруулна гэх мэдээллийн дараа Украины жүдогийн холбоо үүнийг эсэргүүцэж, бойкот зарлалаа. Орос, Украин хоёр улсаас нийт 20 гаруй тамирчин барилдах гэнэ. Олон улсын олимпийн хорооноос дайныг дэмжээгүй, сурталчлаагүй Орос, Беларусын тамирчдыг дундын статустай тэмцээнд оруулах зөвлөмж спорт холбоодод хүргүүлсэн билээ. Гэтэл энэ шийдвэр нь Украинд таалагдсангүй.

Украины жүдогийн холбооны мэдэгдэлд "Бид энд төвийг сахисан байдал, тэгш нөхцөл байдлыг "энх тайвны гүүр" гэж харахгүй байна" гэжээ. Олимпийн хүрэл медальт Украины жүдоч Дарья Билодид ч дээрх шийдвэрийг эсэргүүцжээ. Тэрбээр "Өдөр бүр украинчуудыг хөнөөж байгаа террорист улсын цэргийн албан хаагчдыг олон улсын тэмцээнд оролцуулах нь байж боломгүй гэж би бодож байна. Энэ бол спортын үнэ цэнийн тухай огт биш" гэж сошиалд бичжээ.

Харин Олон Улсын жүдогийн мэдэгдэлд "Олимпийн мөрөөдлөө биелүүлэх хүсэлтэй жүдо бөхийн бүх тамирчдад шударга оролцох, тэгш боломжийг олгох хэрэгтэй" гэж мэдэгджээ.

Монголын шигшээ баг

Монголоос нийт 18 жүдоч өрсөлдөх бөгөөд хөнгөн жин буюу эрэгтэйчүүдийн 60кг, 66кг эмэгтэйчүүдийн 48кг, 52кг-ын тамирчид өчигдөр/2023.05.02/ Дохаг зорилоо. Шигшээ багийн бүрэлдэхүүнд дараах тамирчид багтжээ. 

ЭРЭГТЭЙЧҮҮДИЙН -60 КГ

• Э.Ариунболд

-66 кг

• Б.Эрхэмбаяр
• Ё.Басхүү

-73 кг

• Ц.Цогтбаатар
• Б.Эрдэнэбаяр

-81 кг

• Г.Болор-Очир

-90 кг

• Г.Алтанбагана

-100 кг

• Б.Гончигсүрэн

+100 кг

• О.Цэцэнцэнгэл

ЭМЭГТЭЙЧҮҮДИЙН -48 КГ

• Г.Наранцэцэг
• Б.Баасанхүү

-52 кг

• Л.Сосорбарам
• М.Нандин-Эрдэнэ

-57 кг

• Л.Энхрийлэн
• М.Ичинхорлоо

-70 кг

• Б.Ням-Эрдэнэ

-78 кг

• О.Хүслэн

+78 кг

• А.Адъяасүрэн

Шигшээ багийн ахлах дасгалжуулагчаар Гавьяат тамирчин, дасгалжуулагч Х.Болдбаатар, гавьяат тамирчин Г.Болдбаатар, гавьяат тамирчин М.Бундмаа нар ажиллах бол эмч, терапистаар Масатоши Нишикидо ажиллана.

ДАШТ-ээс алтан медаль хүртвэл 10 сая төгрөг, мөнгөн медаль хүртвэл 5 сая төгрөг, хүрэл медаль хүртвэл 3 сая төгрөгөөр урамшуулахаар Жүдо бөхийн холбооны дэд ерөнхийлөгч Г.Дашням мэдэгдсэн билээ.