Зам, тээвэр хөгжлийн сайд С.Бямбацогт төмөр замд үүсээд байгаа авлигын асуудалд харамсаж буйгаа илэрхийлэв. Ялангуяа УБТЗ-ын Тээвэр зохицуулалтын албаны орлогч дарга С.Батдөлийн их хэмжээний авлига улам нэрмээс болов. Ерөнхий сайд “Дараагийн дэлбэлэх салбар нь Төмөр зам. Болгоомжтой байгаарай” хэмээн хатуухан анхааруулсан. Энэ мэтээр салбарынх нь нэр хүнд ар араасаа уналтад орж байгаад эрхэм сайд харууслаа илэрхийллээ.

Тэрбээр “УБТЗ-д бугшсан авлигын асуудал 16 мянган төмөр замчдын маань урмыг хугалсанд үнэхээр харамсаж байна. Энэ асуудлыг үндсээр нь таслан зогсоож, холбоотой бүх этгээдэд хатуу хариуцлага тооцож, хуулийн байгууллагад шилжүүлэх болно. 
Мөн төмөр замчдынхаа өнгөрөгч оны үр дүнгийн цалинг 100 биш 200 хувиар тооцож олго гэсэн чиглэлийг УБТЗ-ын удирдлагад Сайдын шуурхай хуралдаанаар үүрэг болголоо. Авлигачдад халгаатай, ажилтнууддаа ээлтэй байж, Төмөр замын салбар зөв голдирлоор хөгжинө” хэмээлээ.