Эрүүл мэндийн сайд С.Чинзориг Засгийн газрын хуралдаанаар хэлэлцсэн асуудлын талаар мэдээлэв.

Эрт илрүүлгийг энэ онд эхлүүлснээс хойш нийт хүн амын 29 хувь нь хамрагджээ. Нэг сая орчим хүн үзлэг оношилгоо хийлгэсний дийлэнх нь эмэгтэйчүүд байна. Газар зүйн байршлаар аваад үзвэл 50 хувь нь нийслэлийн, 50 хувь нь хөдөөгийн иргэд байна. Энэ онд эрт илрүүлэгт 60 тэрбум төгрөг төсөвлөжээ.    

Оюутнуудын эрүүл мэндийн даатгалд хамрагдалт бага байдаг тул эрт илрүүлгийн урьдчилсан сэргийлэх үзлэгт тэд бүрэн хамрагдаж чадахгүй байгаа юм. Энэ асуудлыг шийдэх үүргийг Эрүүл мэндийн сайд С.Чинзоригт даалгажээ.

Мөн сумын эрүүл мэндийн байгууллагууд 18-30 насны иргэдийн урьдчилан сэргийлэх багцыг цогцоор нь хэрэгжүүлбэл Эрүүл мэндийн даатгалын сангаас зардлыг нь гаргах болжээ.

Эрт илрүүлэгт хоёр асуудал үүсжээ. Цахим эрүүл мэнд хөтөлбөр санхүүжилтгүйн улмаас зогсжээ. Аймгийн нэгдсэн эмнэлгүүдэд ходоодны дуран хангалтгүй байлдгийг нэмэхээр ажиллаж байна гэж Эрүүл мэндийн сайд танилцуулав.       

Эрт илрүүлгийн хамрагдалтыг энэ онд 80 хувьд хүргэж, ирэх жил үргэлжлүүлнэ.

Ерөнхий сайд Л.Оюун-Эрдэнэ даваа гарагт өрхийн эмч нартай уулзсан юм. 30 орчим өрхийн эмч уулзалтад оролцож, Ерөнхий сайдад программ хангамжуудыг сайжруулах, санхүүжилт олгоход баримталдаг шалгуур үзүүлэлтүүдийг эргэн харах, эмчилгээний тариф нэмэхийг хүсжээ.

Өрхийн эмнэлгүүд хувийн хэвшилд тооцогддог, бүрэн хариуцлагатай нөхөрлөл гэсэн статустай байдаг. Засгийн газар цаашид өрхийн эмнэлгийн эмч нар тухайн нөхөрлөлийнхөө гишүүн байх тухай шинэ хуульд заахаар төлөвлөж байна.