Хөгжлийн банкны гэх гэм буруугийн шүүх хурал 15 дахь өдрөө үргэлжилж байна. "Вертэкс майнинг" компанийн зээлийн асуудалтай холбогдуулан прокурор тодруулга, мэдээлэл авч байна. Шүүгдэгч, УИХ-ын гишүүн Г.Амартүвшин прокурор болон хохирогч Хөгжлийн банкны төлөөллийн асуултад хариуллаа.

Прокурор: Үндсэн компани нь Энержи ресурс. Үүний туслан гүйцэтгэгч нь "Вертэкс майнинг" компани юм билээ. Үндсэн компани тухайн төсөл хөтөлбөрийг хэрэгжүүлж байгаа. Гэтэл туслан гүйцэтгэгч компани нь манайх хэрэгжүүлж байгаа гээд зээл авч болох уу?

Г.Амартүвшин: Миний хувьд болно гэж бодож байгаа. Энержи ресурс олборлох чадваргүй ч юм уу, өөр асуудлаар өөр компанитай гэрээлж болно шүү дээ. Яагаад болохгүй гэж. Хөгжлийн банкны эцсийн зорилго нь Монгол Улсын экспортыг дэмжих төсөл хөтөлбөрийг санхүүжүүлэх шүү дээ. Тэгэхээр нүүрсний экспортыг л дэмжиж байгаа нэг хэлбэр. Намайг Хөгжлийн банкны гүйцэтгэх захирлаар ажиллаж байхад Засгийн газраас уул уурхайн олборлох салбарыг дэмжих нэн шаардлагатай гэдэг чиглэл барьж байсан. "Вертэкс майнинг"  хөрс хуулалтын компани.

Прокурор: Та Х.Ганхуяг гэдэг хүнтэй ямар холбоотой вэ? Х.Ганхуяг тантай найз нөхдийн харилцаатай байсан гээд мэдүүлээд байгаа.

Г.Амартүвшин: Бид хоёр УИХ-ын гишүүд.

Прокурор: "Вертэкс майнинг" компанийн зээл судлагдаж байхад түүнийг таньдаг байсан уу?

Г.Амартүвшин: Би банкны удирдлагын хувьд маш олон компанийн захирлуудыг таньдаг байсан.

Прокурор: Хөгжлийн банкнаас тус компанийн зээлийг судалж байх хугацаанд 2019 оны 12 сарын 10-14-ны өдрүүдэд Улаанбаатараас Сөүл-Сөүлээс Улаанбаатар чиглэлд, мөн зээлийн шийдвэр гарсан үед Х.Ганхуяг, Амартүвшин нар онгоцоор байнга хамт явсан баримт байна. Энэ яамр учиртай юм бол?

Г.Амартүвшин: Прокурор ингэж мушгиж асуухгүй ээ. Миний хувьд гадагшаа явах ховор үзэгдэл биш. 2019 оны наймдугаар сард Сөүл, есдүгээр сард Япон, аравдугаар сард АНУ, арваннэгдүгээр сард Сингапур явсан. Онгоцонд Х.Ганхуягийг харсан. Би бүр урд, Х.Ганхуяг хол, өөр газар суусан байсан. Нэг онгоцоор хамт ниссэн тохиолдлын зүйлийг ингэж болохгүй.

Хөгжлийн банкны төлөөлөл: "Вертэкс майнинг" компанийн хувьцаа эзэмшигч нь ямар компани болохыг та мэдэх үү.

Г.Амартүвшин: Мэдээлэл нь хавтаст хэрэгт чинь байгаа биз дээ.

Хөгжлийн банкны төлөөлөл: Та УИХ-ын чуулганы танхимд үг хэлж, попроогүй шүү. Энэ бол Монгол Улсын шүүх. "Вертэкс майниниг" компаниас танд хандаж явуулсан 4 ширхэг албан бичгийг та мэдэж байгаа юу?

Г.Амартүвшин: Мэдэхгүй.

Хөгжлийн банкны төлөөлөл: "Вертэкс майнинг" компанийн авсан 33 тэрбум төгрөгийн зээлийн санхүүжилтийг өөр компанийн өрийг дарахад ашиглах гэж байсныг мэдэх үү?

Г.Амартүвшин: Юу асуугаад байгаа юм бэ?. Мэдэхгүй, хариулахгүй.