Байгаль орчин, аялал жуулчлалын сайд Б.Бат-Эрдэнэ Сүхбаатар дүүргийн удирдлагуудыг шүүмжилж, усны эх ундарга дээр замбараагүй газар олгосноор усгүй болох аюул нүүрлэж байгаад сануулга өгчээ.

Тодруулбал, "Сүхбаатар дүүргийн удирдлагуудын 2012 оноос хойшхи газар олголтууд Ойн тухай хууль, Усны тухай хуулиудыг ноцтой зөрчсөн байна. Мод бут сүйтгэсэн, голын голдирол өөрчилсөн, хөрс сүйтгэсэн, цэвдэг устгасан гээд маш их хохирол тооцогдохоор хэмжээнд очжээ. Хохирлын үнэлгээг заавал тогтоож холбогдох албан тушаалтнууд хариуцлага хүлээх ёстой.

Дүүргийн удирдлагуудаас нэг ч хүн ирсэнгүй! Усны эх ундарга дээр замбараагүй газар олгосноор усгүй болох аюул нүүрлэж байна.

Гол мөрний эх, ундаргыг хамгаалахгүйгээр сэргээх тухай яриад нэмэргүй. Тиймээс Байгаль орчин аялал жуулчлалын яам Усны газар, Ойн газрын удирдлагууд өнгөрсөн долоо хоногоос эхлэн Улиастай, Тэрэлж, Гачуурт, Хандгайт, Сэлбэ, Туул голоор ажиллаж байна. Танилцуулгыг УИХ-ын холбогдох байнгын хороонд удахгүй танилцуулна" хэмээжээ.