Ахмадууд улсдаа насаараа нийгмийн даатгал төлөөд ч үр өгөөжийг нь хүртэж чаддаггүй. Эмэгтэй 55, эрэгтэй 60 насанд өндөр насны тэтгэвэрт гардаг ч хэдхэн жил хаанаа ч хүрэлцэхгүй тэтгэврийн хэдхэн төгрөгөөр амь зууж байгаад ч насан эцэслэдэг. Учир нь, монгол хүний дундаж наслалт 73 гэж тооцсон байдаг. Тиймээс ч насаараа хөдөлмөрлөсөн ахмадууд тэтгэврийн хэм хэмжээг нэмэгдүүлэх, аль нэг нь насан эцэслэсэн тохиолдолд нөгөөд нь хувь олго гэдэг ч төр, засаг нүдэн балай, чихэн дүлий явсаар ирсэн. Тэгвэл Хөдөлмөр, нийгмийн хамгааллын сайд Т.Аюурсайхан Нийгмийн даатгалын ерөнхий хуулийн төсөл, нийгмийн даатгалын сангаас олгох тэтгэврийн тухай хуулийн төслийг УИХ-ын даргад өргөн барьсан билээ. Үүнд, хэд  хэдэн онцлох зүйл заалтыг тусгаж өгсөн  ба баталсан тохиолдолд ахмадуудад нэн таатай эрх зүйн орчинг бүрдүүлэх юм. Тухайлбал, 
-Тэтгэврийг зөрүүг арилгаж, нийгмийн даатгалын шимтгэлийн хувь хэмжээг нэмэгдүүлэхгүй байхаар хуульчилсан ба орлогын тодорхой хувийг Хуримтлалын нэгдсэн санд байршуулах замаар эрүүл мэнд, боловсрол, орон сууцны санхүүжилтийн эх үүсвэрт зарцуулах нөхцөлийг бүрдүүлнэ. 
-Нэрийн дансны орлогын тодорхой хэсгийг хууль ёсны өв залгамжлагчид  өвлүүлэхээс гадна хувийн нэмэлт тэтгэврийн хууль эрх зүйн орчинг бүрдүүлж, олон эх үүсвэрээс тэтгэвэр авах нөхцөл бүрдүүлэхээр төсөлд тусгажээ. 
-Хуулийн төсөлд ахмадуудын хүсэн хүлээдэг тэтгэврийн хэмжээг жил бүр инфляцын түвшинтэй уялдуулан нэмэгдүүлнэ гэх гол заалтыг оруулж өгсөн ба тэтгэвэр авах шударга тогтолцоо бүрдүүлэх эрх зүйн орчинг бүрдүүлж, 20-иос дээш жил шимтгэл төлсөн жил тутамд тэтгэвэр бодох хувийг нэмэгдүүлэхээр заажээ. Мөн тэтгэвэр авагч эхнэр, нөхрийн аль нэг нь нас барсан тохиолдолд үлдсэнийнх нь өндөр насны тэтгэврийн хэмжээг 20 хувиар нэмэгдүүлдэг  байхаар тусгажээ.
Цаашлаад Б.Пүрэвдорж гишүүн тэтгэврийг долоо биш таван жилээр тооцохыг  шаардаж буй. Түүний өргөн барьсан хуулийн төслийн гол заалт энэ бөгөөд харин Т.Аюурсайхан сайдын өргөн барьсан төсөлд ч энэ нь биеллээ олжээ. Тодруулбал, тэтгэвэр бодох сарын дундаж хөдөлмөрийн хөлс, түүнтэй адилтгах орлогыг тооцох дараалсан долоон жилийг тав байхаар тусгажээ.