Улаанбаатарчуудын хувьд утаа, түгжрэлээс гадна бас нэг тулгамдсан асуудал нь хотын үнэр юм. Урин дулааны цагт бүр ч илүү үнэртдэг өмхий үнэр яг юунаас шалтгаалдаг талаарх асуудал маргаантай хэвээрээ буй.

"Харгиа цэвэрлэх байгууламж арьс ширний үйлдвэрүүдийн усыг цэвэршүүлэх үүрэгтэй. Энэ цэвэрлэх байгууламж өөрийн ачааллаас давсан ачаалалтай ажиллаж байгаа учраас усыг бүрэн цэвэрлэж чадахгүй байна гэсэн үг" гэдэг тайлбар Төв цэвэрлэх байгууламжийн төлөөлөл өмнө нь өгсөн.

Энэ талаар Монголын арьс ширний үйлдвэрлэлийн холбооны тэргүүн Д.Баярсайхан "Үйлдвэрийг битүү, үнэргүй байлгах тал дээр анхаарч ажиллаж байна. Хотод үнэртэж байгаа үнэр бол Харгиа цэвэрлэх байгууламжаас гарч байгаа.

Арьс ширний үйлдвэрүүд нүүхээр энд байгаа оршин суугчдын ахуйн бохирдлыг хариуцах цэвэрлэх байгууламж болно. Арьс шир үнэртдэг байсан бол цаашдаа ахуйн бохир үнэртэнэ. Үнэрийн хувьд цаашид байна. Арьс ширний үйлдвэрүүд нүүсний дараа Дэлхийн банкны санхүүжилтийн хөрсний бохирдлыг арилгах талаар ажиллана. Манай холбоо энэ талаар Нийслэлийн Засаг Даргын Тамгын Газартай хамтран ажиллаж байна.

Хөрсний бохирдлыг бууруулах хамгийн сайн арга бол цементэн зам засах юм. Мөн зүлэг мод ургуулах ажлыг хийж байгаа. Үйлдвэрүүд нүүсний дараа спортын ордон, цэцэрлэг, сургууль, орон сууц зэргийг барихаар төлөвлөж байна. Зарим нэг бохирдолтой хөрсийг ачиж зөөх байх" гэдгийг хэллээ. 

"Арьс ширний ихэнх үйлдвэр бага оврын цэвэрлэх байгууламжтай"

Харин "Мон Ирээдүй" ХХК-ийн захирал А.Ганбилэг "Одоогийн арьс ширний ихэнх үйлдвэр ус цэвэршүүлэх хүчин чадалтай бага оврын цэвэрлэх байгууламжийг үйлдвэр дотроо шийдэж өгсөн. Манай цэвэрлэх байгууламжийн хувьд өдөрт 300 метр куб ус цэвэршүүлэх хүчин чадалтай. Тухайн ус нь цэвэрлэх байгууламжийн хоёр шат дамжлагаар цэвэрлэгдээд Төв цэвэрлэхэд очдог.

Тухайн цэвэрлэх байгууламж нь үнэр гэхээс илүүтэй ус, бусад химийн бодис гээд бүгдийг нь цэвэрлэдэг. БНСУ, Япон явж туршлага судлаад ирэхэд арьс ширний үйлдвэр бага зэргийн үнэртэй л байдаг юм байна. Хотод үнэртээд байгаа үнэр биднээс шалтгаалаагүй. Төв цэвэрлэх байгууламжийн хүчин чадал хүрэлцэхгүй байгаа юм. 

Олон янзын байшин барилга бариад л байдаг. Төв цэвэрлэх байгууламжийн хүчин чадлыг нэмэгдүүлэхэд анхаарах хэрэгтэй" хэмээв.