Өвөрхангай аймгийн Зүүнбаян-Улаан сумын малчин Д.Буянтогтохын гэр бүлийн тэжээсэн бугын элийг 2022 оны арваннэгдүгээр сард Богдхан уулын Тайны аман дахь бэлчээрийн талбайд нутагшуулсан билээ.  

Малчин гэр бүл 2020 оны тавдугаар сард осгосон бугын элийг тэжээн өсгөсөн бөгөөд тэрхүү амьтнаа Борхүү гэж нэрлэжээ. Хүнтэй ижил дасал болсон энэ амьтан хол замыг туулж тэжээсэн айлдаа очсон мэтээр зарим сайтад мэдээлжээ.

Энэ талаар Богдхан уулын хамгаалалтын захиргаанаас тодруулахад, Бугын элийг байгальд дасгах, зэрлэгээр амьдрах чадварт сурах хүртэл зургаан сарын хугацаанд Богдхан уулын Тайны аман дахь амьтан асран хамгаалах чиглэлээр үйл ажиллагаа явуулдаг “Мөнгөн эгшиг” ХХК-ийн талбайд бэлчээрлүүлсэн. Бугын элийг тэжээсэн айл руугаа явсан гэх мэдээлэл худлаа.

Бугын элий хүний хамааралгүйгээр байгальд амьдрах чадвартай болсон гэж үзсэн тул энэ тавдугаар сард компанийн хашаанаас гаргаж, байгальд чөлөөтэй тавих гэж байна гэв.