Коронавирусийн хувилбарын тархалт дэлхий дахинд болоод манай улсад ямар байгаа талаар ХӨСҮТ-өөс өнөөдөр танилцуулсан юм. 

Энэ үеэр ХӨСҮТ-ийн эмч н.Гарамзул "Омикроны омог нь 2021 оны зургаадугаар сард анх Энэтхэг улсад бүртгэгдсэн. Манай улсад омикроны хувилбар анх гарахад BA5, BA2 гэсэн мутацтай илэрч байсан.

2023 оны гуравдугаар сарын 9-нд омикроны дэд хувилбар болох XBB.1.5, XBB.1 мутацын анхны тохиолдол бүртгэгдсэн. Он гарсаар 15 дугаар долоо хоногт XBB.1.5 хувилбар давамгайлах хандлагатай гэж судлагдсан юм" хэмээв.  

Үргэлжлүүлэн омикроны дэд хувилбар болох XBB.1.5 мутацын эмнэлзүйн шинж тэмдэг, эмнэлгийн орны ачааллын талаар ХӨСҮТ-ийн эмч н.Ариунбилэг мэдээлэв. 

Тэрбээр "Өнөөдрийн байдлаар ХӨСҮТ-д КОВИД-19-ийн тохиолдлоор хэвтэн эмчлүүлж байгаа 101 хүн бий. Үүнээс жирэмсэн эмэгтэй 19, төрсний дараах байдалтай хоёр ээж, хүүхэд 27 байгаа. Биеийн байдлаар нь авч үзвэл нэн хүнд өвчтөн гурав, хүнд долоон өвчтөн байгаа юм.

Энэ төрлийн хувилбараар өвдсөн өвчтөнүүдийн 70-80 хувьд хамар битүүрэх, ядрах, үе мөчөөр өвдөх гэсэн нийтлэг шинж тэмдэг илэрсэн. Мөн хуурай ханиах, хоолой болон толгой өвдөх, амьсгаадах, нусгайрах гэсэн ерөнхий шинж тэмдгүүд илэрч байна" гэдгийг хэлэв.