УИХ-ын гишүүн Э.Бат-Амгалан, Хууль зүй, дотоод хэргийн яамны Төрийн нарийн бичгийн дарга П.Сайнзориг нар мэдээлэл хийлээ. Э.Бат-Амгалан гишүүн "Засгийн газраас Шүүх шинжилгээний тухай хуулийг санаачлан боловсруулж, УИХ-аар хэлэлцүүлэхээр Ажлын хэсэг байгуулсан. Энэ ажлын хэсгийг миний бие ахалж, 7-8 сарын хугацаанд иргэдээр хэлэлцүүлж, УИХ-аар батлуулсан. Шүүх шинжилгээний тухай хуулийг нэгдүгээр сарын 1-нээс мөрдөж эхэлсэн. Зорилго нь хэрэг маргааныг үнэн бодитоор, шинжээчийн дүгнэлтийг үндэслэж шийдвэрлэхэд оршино гэлээ. 
Үүний дараа  Хууль зүй, дотоод хэргийн яамны Төрийн нарийн бичгийн дарга П.Сайнзоригоос  зарим нэг асуултад хариулт авлаа. 
-Шүүх шинжилгээний тухай хуульд талийгаачийн ар гэрээс авдаг хэд хэдэн төлбөрийг Эрүүл мэндийн даатгалын сангаас хариуцахаар болсон гэсэн. Энэ талын мэдээлэл өгөөч?
-Амь насаа алдсан иргэдийн ар гэрээс цогцост шинжилгээ хийхэд төлбөр авдаг байсныг Эрүүл мэндийн даатгалын сангаас төлүүлдэг тогтолцоонд шилжүүлж байгаа. Шүүх шинжилгээний амбулаторийн зардлыг мөн дээрх сангаас гаргана. Гэмт хэргүүд шийдэгдэхгүй байгаа гол шалтгаан нь хохирлын үнэлгээг тогтоох зардлыг мөрдөн шалгах байгууллагад тусгаж өгдөггүйтэй холбоотой. Яамнаас үнэлгээний эрх авсан байгууллагуудаар хийлгэе гэхээр хохирлыг үнэлгээний 5-10 хувийг нэхдэг. Энэ нь хэдэн арван тэрбум болдог. Тиймээс сангаас төлүүлэхээр болж байна. 
-Байгаль орчинд учруулсан хохирлыг барагдуулах тусгай нэгжийг Шүүх шинжилгээний байгууллагад байгуулсан гэлээ?
-Шүүх шинжилгээний байгууллагад тусдаа нэгж гаргаад, экологийн эсрэг гэмт хэрэг үйлдсэн хүн ял завшдаг байдлыг таслан зогсоож, буруутай этгээдээр байгаль орчинд учирсан хохирлыг төлүүлдөг болсон гэлээ.