“Хөнгөн хэрэг үйлдсэн. Тиймээс батлан даалтад гармаар байна” хэмээн өөрийгөө өмгөөлж суусан С.Батдөлд холбогдох хэргийн зүйл анги өдрөөс өдөрт нэмэгдсээр. Монгол Улсад мөрддөг эрүүгийн хуулийн хамгийн томд ордог гэмт хэргийг тэрбээр үйлджээ. Тухайлбал, мөнгө угаасан, онц их хэмжээний татвараас зайлсхийсэн гэдгийг шүүх гарган тавьсан бол өдгөө үндэслэлгүйгээр хөрөнгөжсөн, бусдыг залилан мэхэлсэн, албан тушаал, эрх мэдлийн байдлаа ашиглан авлига, хээл хахууль авсан хэрэгт буруутгагдаад байна.  Эрүүгийн хуулийн хамгийн хүнд таван зүйл ангиар түүнийг яллагдагчаар татсан ба харин С.Батдөлийн хувьд энэ нь байх л зүйл мэт аашилж байгаа юм. 
Прокуророос яллагдагч С.Батдөлд 5-12 жилийн хорих ял оноох зүйл ангиар буруутгаад байгаа ба гэрээс нь хураасан 7,3 тэрбум төгрөг болон дөрвөн тэрбумын үл хөдлөх хөрөнгийг зарж борлуулан  мөнгийг нийлүүлэн улсын орлого болгох юм.