Толгойт гол орчимд 2100 айл өрх суурьшдаг ба яг одоогийн байдлаар 100 гаруй  нь маш хүнд нөхцөл байдалд орж, тэдгээрээс 10-15 айл усанд автсанаас Геодези, усны барилга, байгууламжийн газраас шуурхай баг гарган ажиллаж, шаардлагатай бүх арга хэмжээг шуурхай авч байгаа ч үр дүн муу байгаа аж. Энэ талаар ОНӨААТҮГ-ын дарга Л.Ариунтуяа “Геодези, усны барилга, байгууламжийн газар бүх дүүргийн захиргаа, газрын албатай хамтран ажилладаг. Эрсдэлтэй бүсэд суурьшсан айлуудыг нүүлгэн шилжүүлэх тухай асуудлыг олонтаа хөнддөг. Гэвч иргэд суурьшиж дассан газраасаа нүүх боломжгүй гэдэг. Бидний зүгээс жалга, сайр, булаг шанд, гол горхины орчимд болон үерийн хамгаалалтын далан, сувагт гэрээ барихгүй байхыг иргэдэд уриалдаг ч энэ мэт эрсдэлийг үл тоодог. Манай байгууллагын хувьд 141 ажилтантай, баг гарган өдөр бүр ажиллуулж байна. Өдөрт 1-10 дуудлага хүлээн авч, халиа тошин үүссэний улмаас зарим авто зам, гүүр усанд автаж, цас мөсөнд дарагдсан газрыг гараар цэвэрлэж, ус чөлөөтэй урсгах боломжтой болгодог. Ийм газруудад хөрс, усны бохирдол ихтэй, нөхцөл байдал амаргүй, мөн автомашин техник багтахгүй, заавал хүн орж цэвэрлэхээс өөр аргагүй үе олон гарч байна”гэлээ.