Тариалан Эрхлэлтийг Дэмжих Сангийн 10 000 тонн улаан буудайг хадгалж байхдаа горим зөрчиж, дэлбэлж, шатаасан “Дархан гурил тэжээл” ХК-аар шүүхээс хохирлыг төлүүлэх шийдвэр гаргаж байсан удаатай. Гэтэл улсад 3.5 тэрбум төгрөгийн хохирол учруулсан ч төлөөгүй тус  компаний хамгийн том хувьцаа эзэмшигч Д.Балдан-Очирын Хөгжлийн банкнаас авсан 18 тэрбум төгрөг ногоон гэрлээр данс руу нь оржээ.

Одоог хүртэл Дархан гурил тэжээл компани 18 тэрбумыг авсан ч юу хийсэн, улсад юу өгсөн нь тодорхойгүй болж мартагдсан. Ийм нэгэн өрийн сүлжээ үүсгэсэн  байгууллага 2011 онд  ХААДС-аас 5 тэрбум 455 сая 883 мянга 360 төгрөгний зээл аваад эргэн төлөөгүй байна.

Хархорин чацаргана компанийг 2017 онд улсын бүртгэлд бүртгүүлсэн Сүрэнжавын Пүрэв 2013 болон 2015 онуудад улсын төсвөөс БНХАУ-ын Засгийн газрын зээлийг авсан билээ. Тус компани өнөөдөр нэг тэрбум 817 сая 410 мянган төгрөгний зээлийн үлдэгдэлтэй байна.

"Хархорин" ХК 200 га талбайд чацаргана тариалж жимс үйлдвэрлэх төслийг Өвөрхангай аймагт хэрэгжүүлэхээр Улаанбаатар хотын банкаар дамжуулан 2.8 тэрбум төгрөгийг авсан байна.  Ийнхүү удаа дараа зээлээ авч царцаасан Хархорин компаний захирал С.Пүрэв бол нэгэн цагт Сангийн яамны дэд сайдын алба хашиж байсан нэгэн билээ.