Гол нэрийн барааны дундаж үнэ өмнөх сараас 8.7 хувиар, өмнөх долоо хоногоос 1.2 хувиар өссөнийг Үндэсний Статистикийн Хорооноос мэдээлэв.

Үүнээс ямааны ястай махны үнэ хамгийн их нэмэгджээ. Тавдугаар сарын 22-ны байдлаар ямааны ястай мах дунджаар 11,664 төгрөгөөр худалдаалж байсан бол одоо 12,658 төгрөг болж өсөөд байна. 

Хонины махны үнэ өмнөх долоо хоногоос бараг 500 төгрөгөөр өсөж, 16,533 төгрөг болжээ. Энэ нь өмнөх сараасаа бараг 2,500 төгрөгөөр өссөн дүн юм.

Харин үхрийн цул махны үнэ килограмм нь өмнөх долоо хоногоосоо 352 төгрөгөөр нэмэгдэж, 21,852 төгрөг болов. Өөрөөр хэлбэл, үхрийн цул мах өмнөх сараасаа 4,000 орчим төгрөгөөр өслөө.

Мөн байцай, хүрэн манжин, сонгино зэрэг хүнсний ногооны үнэ өмнөх долоо хоногоос 150-234 төгрөгөөр нэмэгджээ.

Өмнөх долоо хоногоос үнэ буурсан цөөн нэр төрлийн бүтээгдэхүүн байна. Тодруулбал, задгай сүүний нэг литрийн үнэ 47 төгрөгөөр, өндөгнийх 13 төгрөгөөр буурав.