Санхүүгийн зохицуулах хорооноос нүүрсний арилжааг нээлттэй, ил тод, шударгаар зохион байгуулах, цахимаар арилжаалах бэлтгэл ажлыг хангуулах хүрээнд арилжаа зохион байгуулах этгээд болох “Монголын хөрөнгийн бирж” ХК, нүүрс худалдагч талаас “Эрдэнэс Тавантолгой” ХК, “Энержи ресурс” ХХК-ийн төлөөллүүдтэй  уулзжээ. Энэ үеэр шаардлагатай арга хэмжээнүүдийг шуурхай авч хэрэгжүүлэх талаар чиглэл өгч, арилжааны заавар, маягтуудын талаар хэлэлцсэн байна. 
Засгийн газраас 2022 оны 466 дугаар тогтоолоор нүүрс экспортлогч аж ахуйн нэгжийн экспортод гаргах нүүрсийг цахимаар нээлттэй арилжих үйл ажиллагааг зохион байгуулах, түүнтэй холбогдон үүсэх бусад харилцааг  зохицуулсан “Экспортод гаргах нүүрсний нээлттэй цахим арилжааны журам”-ыг баталсан. Уг журмын хэрэгжилтэд Санхүүгийн зохицуулах хороо хяналт тавихаар зохицуулсан юм.
Мөн нүүрсний салбарын мэдээллээс хүргэхэд,  Засгийн газрын 362 дугаар тогтоолоор нүүрсийг хил үнээр борлуулах байнгын ачаа тээвэрлэх С зөвшөөрөл олгох эрхийг олборлолтын үйл ажиллагаа явуулж буй аж ахуйн нэгжүүдэд шилжүүлсний дагуу “Эрдэнэс Тавантолгой” ХК 2023 оны нэгдүгээр сарын 15-наас С зөвшөөрөл олгож эхэлнэ.
2023 оны нэгдүгээр сарын 15 хүртэл хуучин С зөвшөөрөл буюу өнгөрсөн оны 4 дүгээр улирлын зөвшөөрлөөр нүүрс тээвэрлэлт хийгдэж байгаа аж. Мөн УУХҮЯ, Монголын Хөрөнгийн бирж, "Эрдэнэс Тавантолгой" ХК-ийн хамтарсан ажлын хэсэг нүүрсийг биржээр нээлттэй худалдаалахаар бэлтгэл ханган ажиллаж буй бөгөөд ирэх хоёрдугаар сарын 1-нээс нүүрсийг хил үнээр биржээр худалдаална.