Улаанбаатар хотыг тойрсон товчоодыг цахимжуулснаар иргэд зам ашигласны төлбөрөө бэлэн мөнгөөр бус ROADPAY.MN сайтаар төлөх болсон. Тэгвэл товчоодоор нэвтэрсэн жолооч нарын ердөө таван хувь нь төлбөрөө хугацаанд нь төлжээ. 
Ийн хойрго хандаж байгаа тул 2023 оны нэгдүгээр сарын 1-нээс жолооч нар автомашины оношилгоонд орохдоо зам ашигласны төлбөрөө төлсөн байхыг шаардаж эхэллээ. Төлөөгүй тохиолдолд автомашиныг оношилгоонд оруулахгүй юм байна. Жолооч оношилгоонд орохын өмнө roadpay.mn сайтаар болон Ebarimt аппликэйшний хялбар бүртгэл хэсэгт хандан зам ашигласны төлбөрөө шалган төлөх боломжтой. 
Товчоодын цаана гэртэй айл өрх буюу Сонгинохайрхан дүүргийн XXXII хороо, Хан-Уул дүүргийн XIV хороо, Налайх дүүргийн оршин суугчид албан ёсны хаягаараа тухайн хороо, дүүрэгтээ бүртгэлтэй байснаар цагаан жагсаалтад хамрагдан үнэ төлбөргүй зорчих юм байна.