УИХ-ын Төрийн байгуулалтын байнгын хорооноос зохион байгуулж буй “Улс төр, эдийн засаг, эрх зүйн шийдэл. Нийгмийн зөвшилцөл” чуулга уулзалт Төрийн ордонд  болж байна. Тус хэлэлцүүлэгт үе үеийн сайд, дарга нар, эрдэмтэн судлаачид, жагсагчдын төлөөлөл гээд нийт 500 гаруй хүн оролцож байна. 
Энэ үеэр жагсагчдын төлөөлөл У.Цогтбаяр “Жагсагчдын тэмцэл улам өргөжсөөр байна. Бид эхлээд нүүрсний хулгайгаар 40 их наядыг алдлаа хэмээн шуугьж байсан бол өнөөдөр 70 их наядаар яригдаж байна. 3000 гаруй төмөр замчдын шударга хөдөлмөрийг талаар болгосон орлогч даргын асуудал босч ирлээ. Ямар хүн дээр явуулсан гүйцэтгэх ажиллагааны бичлэгийг цацаад, ямрыг нь гаргадаггүй юм бэ. Хилээр нүүрсний 17 мянган автомашин гарчихаад байхад хяналтын хил, гааль, цагдаа, тагнуулын байгууллагууд нь юу хийж байсан юм бэ. Хэн нь ч ажлаа хийгээгүй байна. Дарга нарыг бүгдийг шалгах ёстой. Бүгд шоронд явах ёстой. 

Ерөнхий сайд ард түмэнтэйгээ хамт тэмцье гэдэг үгийг ямар их хэлдэг юм бэ. Шүгэл үлээж байгаа бол үлээсэн шиг үлээ. Амандаа шүглээ зуугаад хамаг чадлаараа үлээ. Өөр юуг хүлээж, хүсээд байгаа юм бэ” хэмээн бухимдлаа.