Юнивишн компани хэрэглэгчиддээ урьдчилан мэдэгдэлгүйгээр үнээ нэмж, эхнээсээ олон үйлчлүүлэгчээс төлбөрөө авсан талаар иргэд олон нийт гомдол гаргасны дагуу ШӨХТГ болон бусад хологдох байгууллагууд хамтарсан уулзалт хийжээ. Юнивишн компани үнэ тарифтаа өөрчлөлт оруулах хүсэлтийг харилцаа холбооны зохицуулах газарт ирүүлсэн юм байна. Тус хороо үүнийг хэлэлцээд нэмэлт судалгаа, мэдээлэл гаргуулсны үндсэн дээр  дахин хэлэлцэхээр түр хойшлуулжээ. Харин ингэхдээ хянагдаж дуусах хүртэлх хугацаанд нэмэгдүүлсэн үнээр төлбөр авахгүй байх тухай мэдэгдлийг тус компанид хүргүүлсэн юм байна. Мөн ШӨХТГ-аас ч энэ талаар шаардлага хүргүүлжээ. Гэтэл Юнивишн компани нь дээрх албан мэдэгдлүүдийг авсан хэрнээ хэрэглэгчдээс дараа сарын төлбөрийг нь мөн нэмэгдүүлсэн үнээр нэхэмжилсэн нь зөрчлийн хууль зөрчсөн үйлдэл мөн юм.  Энэ талаар ШӨХТГ-аас албан шаардлага хүргүүлэхдээ, хэрэглэгчдийн илүү төлсөн төлбөрийг дараа сарын төлбөрт суутгуулахаар тусгах хэрэгтэй гэжээ. Юнивишн компанийн хувьд төлбөрөө нэмэх болсон шалтгаанаа, 2019 оноос хойш нэг ч удаа нэмээгүй, гадны контент, кинонуудыг орчуулан үзэгчдэд хүргэдэг гээд шатахууны үнэ нэмсэнтэй мөн холбож тайлбарласан байна.