Яруу найрагч Ц.Хулан нарт холбогдох шүүх хурал өнөөдөр /2023.07.24/ үргэлжилж, прокурор гэм буруугийн дүгнэлтээ танилцуулсан. Өглөөний 09.00 цагт эхэлсэн шүүх хурал түр завсарлаж, дүгнэлтээ танилцуулж дуусчээ. Шүүхийн байрын гадна зарим иргэдийн төлөөлөл цуглаж, Ц.Хуланг суллахыг шаардаж байна. Иргэдийн зүгээс "Яруу найрагч тагнуулын ажлыг бүрэн мэдэхгүй. Шүлэг уран бүтээл нь эх орноо магтан дуулсан байдаг. Яавч тагнуул байх ёсгүй. Шүүхийн байгууллага хэргийг шударга шүүхийг хүсч байна. Шүүх хурал хаалттай үргэлжилж байгаа учраас ямар ч мэдээлэл авч чадахгүй байна" гэдэг байр суурийг илэрхийллээ.
Эргэн сануулахад, Тагнуулын ерөнхий газрын Мөрдөн шалгах газраас Эрүүгийн хуулийн 19.4 дүгээр зүйлийн 1 дэх хэсгийг үндэслэн Ц.Хулан нарыг яллагдагчаар татсан. Яллагдагчаар татсан хуулийн заалтаар Эрүүгийн хуулийн 19.4 дүгээр зүйл. Гадаадын тагнуулын алба, байгууллага, иргэнтэй хууль бусаар хамтран ажиллах
1. Монгол Улсын иргэн гадаад улсын тагнуулын албатай хамтран ажиллахаар тохиролцсон, хамтран ажилласан; гадаадын байгууллага, иргэнд шилжүүлэн өгөх зорилгоор төрийн нууцад хамаарах мэдээ, баримт, эд зүйлийг хулгайлсан, цуглуулсан, хадгалсан, дамжуулсан бол найман жилээс арван таван жил хүртэл хугацаагаар хорих ял шийтгэнэ.