Үерт өртсөн айл өрхүүдийг амьдарч байсан газраас нь аль болох холгүй, хоёр км зайд нүүлгэн шилжүүлэхээр зохион байгуулж байна.

НОБГ-аас орон гэргүй болсон айлуудын судалгаа гаргасан бөгөөд нүүлгэн шилжүүлэх дэд бүтцийг шийдэх, иргэдэд тусламж, дэмжлэг үзүүлэх ажил өнөөдрөөс эхэлж байна. Ингэхдээ орон гэргүй болсон эсэхийг тодорхой шалгуурын дагуу тодорхойлж байгаа. Иргэдээс ирүүлсэн хүсэлтийг дахин нягтлах ажлын хэсэг газар дээр нь ажиллаж судалж байгаа аж.

Нийслэлийн Засаг дарга бөгөөд Улаанбаатар хотын Захирагч, НОК-ын дарга Д.Сумъяабазар өчигдөр үерийн гамшгийн үеэр амь эрсэдсэн хүмүүсийн ар гэрийнхэнд тус бүр хоёр өрөө орон сууц, мөн орон гэргүй болсон 16 өрхөд иж бүрэн тавилгатай гэр олгож, автомашинуудын хохирлыг тодорхой хэмжээгээр барагдуулахаа мэдэгдсэн юм.