Шинэ тутам хэрэгжүүлж эхэлсэн Эрүүгийн байцаан шийтгэх тухай хуульд авлига албан тушаал, үндэслэлгүйгээр хөрөнгөжсөн, татвараас зайлсхийсэн, мөнгө угаасан гэх ноцтой хэргүүдэд оноох ялыг чангатгаж өгсөн. Гэвч энэхүү хуулийг Төрийн мэдээлэл сэтгүүлд албан ёсоор хэвлээгүй учраас одоогоор хэрэгжүүлэх боломжгүй гэсэн үг. Тиймээс 10 тэрбумын С.Батдөлд холбогдох хэргийг эрүүгийн өмнөх хуулиар шийдвэрлэх бөгөөд энэ нь түүний хэлсэнчлэн хөнгөн зүйл ангид хамаарах аж. Энэ нь хялбаршуулсан журмаар буюу торгох ял оноохвий гэсэн хардлага нийгэмд бий боллоо. 
Энэ талаар ХЗДХ-ийн сайд Х.Нямбаатар "Өнгөрсөн долоо хоногт С.Батдөлийн хэрэгт татвар төлөхөөс зайлсхийх гэмт хэргээр зүйлчилж, хэргийг нь замхруулах нөхцөл байдал бүрдлээ гэх агуулгатай мэдээлэл явсан. Энэ хэргийг анх илрүүлсэн байгууллага нь цагдаа. Цагдаагийн байгууллага өөрөө Эрүүгийн тухай хуулийн 16 дугаар зүйл буюу мөнгө угаах ангиар зүйчилж шалгах эрхтэй байдаг. Хоёрдугаарт, үндэслэлгүйгээр хөрөнгөжихөд эрүүгийн хэрэг үүсгэн шалгах эрхтэй. Гуравдугаарт, татвар төлөхөөс зайлсхийх гэдэг гурван зүйл ангиар үйлдлийг газар дээр нь илрүүлж, прокурорт яллагдагчаар татах саналаа оруулсан. Саяхан АТГ-тай хамтарсан ажлын хэсэг байгуулж, өмнө сонсгосон дээрээ ял нэмж сонсгон, Эрүүгийн хуулийн 22 дугаар бүлэгт заасан авилга, албан тушаалын гэмт хэргээр давхар зүйлчилж яваа. Тиймээс С.Батдөлийн хэргийг хялбаршуулсан журмаар шийдвэрлэхгүй" гэлээ.