Олон жил гацаж, нийгэмд хүлээлт үүсгэсэн Хөрөнгө оруулалтын банкны тухай хуулийг УИХ өнөөдөр батална. Энэхүү хуулийг баталснаар Монгол Улсад банк санхүүгийн томоохон байгууллага хуулийн этгээдээр бүртгүүлэн ажиллах эрх зүйн орчин бүрдэх бөгөөд үйл ажиллагаа эрхлэх зөвшөөрлийг Монголбанк олгох юм.
Гадаадын хөрөнгө оруулалттай банкийг оруулж ирснээр зээлийн хүү буурч, банкинд 200 хүний дараа дугаарладаг байдал үгүй болно хэмээн иргэд баярлаж буй. Харин гаднын банк иргэдээс хадгаламж, харилцах татахгүй, жижиглэнгийн зээл олгохгүй аж. Харин эсрэгээрээ зам гүүр, хурдны болон төмөр зам, эрчим хүчний гэх дэд бүтцийн томоохон төсөл хөтөлбөрт урт хугацааны буюу 10-20 жилийн хугацаатай зээл олгохоор зохицуулжээ. Энэхүү хуулийг баталснаар хамгийн түрүүнд салбараа нээх гадаадын банк нь БНХАУ-ын төрийн өмчийн оролцоотой "Bank of China" байна гэдгийг улстөрчид хүлээн зөвшөөрч байна. Тус банк Монгол Улсад төлөөлөгчийн газраа байгуулаад арван жил болж байгаа бөгөөд салбар байгуулах хүсэлтээ Монголбанк, Засгийн газрын түвшинд олонтаа илэрхийлж байсан билээ.