Дорнод аймгийн Чулуунхороот сумын нутаг дэвсгэрт 2023.05.01-нд гарсан хээрийн түймрийг унтраах ажиллагаанд оролцож байсан 1 офицер, 4 ахлагч, 3 Хилийн Цэргийн Алба Хаагч түймэрт өртсөн. Тухайн үед маш яаралтай эмнэлгийн анхан шатны тусламж үзүүлэн түлэгдэлтийн зэргийг тогтоож, 4 Цэргийн Алба Хаагчийг Улаанбаатар хот руу нисдэг тэргээр, үлдсэн 4 Цэргийн Албан Хаагчийг Дорнод аймгийн Бүсийн эрүүл мэндийн төв рүү тээвэрлэн холбогдох эмчилгээнүүдийг хийсэн.

Дорнод аймагт хэвтэн эмчлүүлсэн 4 Цэргийн Алба Хаагч Түлэгдэлтийн зэрэг бага байсан ба тухайн эмнэлэгтээ 14 хоног эмчлүүлээд, бүгд эргэн ажилдаа орсон. 

Харин Улаанбаатар хотод эмчлүүлж байсан 1 ахлагч, 3 Хилийн Цэргийн Алба Хаагч хоёр сарын турш шат шатны эмнэлгүүдэд эмчилгээ хийлгэж, одоо биеийн байдал хэвийн байгаа аж. Тэдгээрээс 2 ХЦАХ нь албанаас чөлөөлөгдөж, 1 алба хаагч нь үргэлжлүүлэн эмчилгээгээ хийлгэж байгаа бол ахлагч нь бүрэн эдгэрч эргэн албандаа оржээ. 

Түймэр унтраах ажиллагаанд оролцсон:

-Цэргийн Алба Хаагчийг ХХЕГ-ын даргын 2023.05.10-ны өдрийн тушаалаар МУ-ын "Онц хилчин" цол тэмдгээр,

-Эмнэлэгийн анхны тусламжийг маш сайн үзүүлсэн эмч эмнэлгийн ажилтнуудыг "Хилийн төлөө" тэмдгээр

-Тус салбарын захирагч, ахлах дэслэгч Г.Ганхүүг Монгол Улсын Ерөнхийлөгчийн 2023.07.03-ний өдрийн зарлигаар "Шударга журам" медалиар тус тус шагнасан байна.

3 ХЦАХ-ийн шагналыг долдугаар сард гэр бүлийг байлцуулан олгож, бусад бүрэлдэхүүний шагналыг хилийн анги руу нь хүргүүлэн олгожээ.

Мөн Улаанбаатар хотод хэвтэн эмчлүүлсэн 4 ЦАХ-ийн цаашдын шаардлагатай эмчилгээний зардалд нийт 45 сая төгрөгийн буцалтгүй тусламжийг тус тус олгоод байгаа талаар Хил Хамгаалах Ерөнхий Газар-аас мэдээллээ.