Бразилын довтлогч Неймар Саудын Арабын хөлбөмбөгийн мэргэжлийн лигийн “Аль-Хилал” багт шилжин очих гэж байгаа тухай мэдээлэл спортын хорхойтнуудын анхаарлыг татлаа.  

Өдгөө “Пари Сен-Жермен”-д тоглож буй тэрбээр 13 тэмцээнд ялалт байгуулахад нь багтаа тусалсан бөгөөд түүний үед 2020 онд ПСЖ Аваргуудын Лигийн финалд шалгарч байв.

“Дэлхийн шилдэг тоглогчдын нэг болох Неймар шиг гайхамшигтай хөлбөмбөгчинд баяртай гэж хэлэхэд үнэхээр хэцүү байна. Тэрбээр ПСЖ-д ирж байсан тэр өдрийг би хэзээ ч мартахгүй, өнгөрсөн 6 жилийн хугацаанд манай клубын төлөө түүний хийсэн зүйлийг нь хэзээ ч мартахгүй” гэж ПСЖ-ийн Ерөнхийлөгч бөгөөд Гүйцэтгэх захирал Нассер Аль-Хелаифи хэлжээ.

ПСЖ клуб 2017 онд Неймарыг 250 сая доллароор худалдан авсан нь тухайн үедээ рекорд тогтоож байв. Зарим мэдээллээр, Неймар Францад байхдаа жилд 25 сая еврогийн орлого олж байсан бол саудчууд түүнд 6 дахин их буюу жилд 150 сая евро өгөхөөр амласан бололтой.

Тэрбээр Парист байхдаа хэд хэдэн удаа гэмтэл авсан бөгөөд 3 дугаар сард хагалгаанд орсны улмаас улирлын зарим тоглолтыг өнжиж, 7 дугаар сараас бэлтгэлдээ гарсан юм. Иймээс ПСЖ-ийн дасгалжуулагч Луис Энрике 31 настай Неймарыг ирэх улиралд талбайд гаргахыг төдийлөн хүсэхгүй байв.  

Неймар Саудын Арабын лигт тоглох гэж байгаа нь тус улсын хөлбөмбөгийн лиг асар их мөнгийг зарцуулах замаар дэлхийн шилдэг лигүүдийн нэг болох зорилгоо хэрэгжүүлэхээр эрчимтэй ажиллаж буйг дахин харууллаа. Өмнө нь Криштиану Роналду, Карим Бензема, Н'Голо Канте, Жордан Хендерсон, Рубен Невес, Садио Мане, Роберто Фирмино зэрэг хөлбөмбөгийн одууд Саудын Арабын лигт шилжин ирсэн билээ.

Харин Неймартай хамт “Аль-Хилал” багт тоглох хөлбөмбөгчдөөс нэрлэвэл, “Вулверхэмтптон” багийн ахлагч байсан Рубен Невес, “Челси”-гийн төвийн хамгаалагч байсан Калиду Кулибали, “Лацио”-гийн тоглогч Сергей Милинкович-Савич нар юм.