Гүйцэтгэх ажиллагааны бичлэг ямар үед ил гарч болоод, ямар үед нууц хэвээр үлддэг юм бэ. Ийм асуулт өөрийн эрхгүй урган гарч байна.
Хэвлэлийнхэн үүргийнхээ дагуу авлига, албан тушаалын дуулиант хэргийн талаарх мэдээ, мэдээллийг АТГ, цагдаагаас авах гэхэд прокурорын зөвшөөрөлгүйгээр өгөхгүй. Прокурор энэ л хэмжээний баримт нотолгоог ярихыг зөвшөөрсөн. Үүнээс өөр мэдээлэл өгөх боломжгүй. Мөрдөн байцаалтын нууц, хүний эрх гэдгээр далайлган хууль ярин халгаахгүй. 
Харин хууль хүчнийхэн өөрсдөө болохоор юун хүний эрх, нэр төр. Хойшлуулшгүй гүйцэтгэх ажиллагаа нэрийн дор нэр усыг зарлаж байгаад гэр, ажилд нь хийсэн нэгжлэгийн бичлэгийг задалж, сейф, цүнх дүүрэн мөнгө хурааснаа дэлгэж үзүүлнэ.
Нэг амаараа хууль дүрэм ярьж, нөгөө гараараа нийгмийн стресс, бухимдлыг төрүүлэхүйц энэ мэт бичлэгийг байсхийгээд задалж, иргэд авлигачид нь яаж амьдраад, харин бид хэмээх атаа хорслыг нийгэмд төрүүлнэ.
Нийгмийн стресс бухимдлыг улам дэврээх зорилготой энэ мэт бичлэгийг байсхийгээд цацахын учир юу вэ. Энэ сэвэлтийн цаана хууль хүчнийнхний холыг харсан эрх ашгийн төлөөх томоохон  нүүдэл яваад байгаа юм биш үү.