АН-ын Үндэсний бодлогын хорооны ээлжит хурал “Туушин” зочид буудалд үргэлжилж байна. Энэ удаагийн хурлаар онцлох хэд хэдэн шийдлийг хэлэлцэх ба нийгмийн чих тавиад байгаа АН-ын даргыг сонгох асуудлыг хэлэлцэхгүй юм байна.
Гэвч далдхан АН-ын даргад горилогчдын цуваа өргөжиж, тус намын малгай дор явдаг, харъяалагддаг эрхмүүд нэрээ дэвшүүлээд эхэлжээ. Тухайлбал, Сангийн сайд асан С.Баярцогт, сайд асан Л.Гантөмөр, хэдийгээр тэмцэгч ч гэлээ сүүлийн үед улс төрийн идэвх нь сулраад байгаа Л.Гүндалай, нам дотроо тулхтай улстөрчид тооцогддог З.Нарантуяа нар өрсөлдөхөө ил тодоор мэдэгдэж, далд тэмцлээ эхлүүлжээ. 
УИХ-ын гишүүн асан Л.Гантөмөр "Би АН-ын даргад нэр дэвшинэ. Ялна гэдэгтэй итгэлтэй байна" гэсэн бол УИХ-ын гишүүн асан Л.Гүндалай "Би АН-ын даргад нэрээ дэвшүүлж байна. Гэхдээ энэ асуудлыг өнөөдрийн хурлаар шийдэхгүй, журмаа л гаргана. АН-ыг ялалтад хүргэх хүн хэрэгтэй. Тэр нь би. Тиймээс ялна гэдэгтээ итгэлтэй байна" гэх  мэдээллийг хэвлэл мэдээлэлд  өгөөд байна.