Дээрхийн гэгээн XIV Далай лам Х Богд Монголоос тодорсныг албан ёсоор зарласан. Тэрбээр Монголд 2016 онд айлчилж, хэвлэлийн бага хурал хийхдээ X Богд Жавзундамба хутагт Монгол Улсад мэндэлсэн болохыг олон нийтэд зарласан. Гэхдээ нас балчир байгаа тул чухам ямар хүүхэд тодорсон талаар мэдэгдээгүй. Харин энэ жилийн сар шинийн 3-ны билэгт сайн өдөр X Богдыг тодруулсан гэх мэдээлэл цахим сүлжээнд цацагдсанаар олон нийт мэдсэн.

Х Богдыг туулай жилдээ багтан албан ёсоор сэнтийд нь залах ёслол болно гэдгийг эх сурвалжууд хэлж буй. Тэгвэл өчигдөр /2023.08.30/ Х Богдыг залах ёслол болоогүй гэдгийг албаныхан мэдээлж байна.

Олон нийтийн сүлжээнд цацагдсан Гандантэгчинлэн хийдэд болсон хурал ном нь Жадо багш Цэвэгмэд ринбүчи дөрөв хоног насны авшиг айлдаж, Х Богдтой номын барилдлага тогтоон Энэтхэгийн их бүтээлчийн Аюуш бурхны насны авшиг дамжлага эрхийг ёсчлон хүртээжээ. Х Богд гэгээний зүгээс хурлыг дааж, хамба лам, хуварга мандал өргөсөн байна.

Х Богдын талаар Монгол Улсын их сургуулийн Антропологи-археологийн тэнхимийн багш Ж.Лхагвадэмчиг өмнө нь байр сууриа илэрхийлэхдээ "Х Богдыг тодруулахын хувьд бол 2016 онд Х Богд Жэвзундамба хутагт Монгол Улсад тодорсон болохыг олон нийтэд мэдээлсэн байдаг. Энэ жилийн Цагаан сарын шинийн гурванд Х Богд Жэвзундамба хутагтыг залах ёслол болсон бол энэ нь хараахан ширээнд залах ёслол биш байх гэж бодож байна.

2011 оны арваннэгдүгээр сарын 2-ний өдөр IХ Богд Жэвзундамба хутагтыг ширээнд нь залсны адил алсдаа Монгол Улсын Буддын шашны нийт сүм хийд, сүсэгтнүүд хуран цуглаж, Х Богд Жэвзундамба хутагтаа залах ёслол үйлдэх байх.

Ер нь бол хутагт хувилгаадыг тодруулсны дараа ширээнд нь албан ёсоор залж байж, хутагт хувилгаад бүрэн баталгааждаг уламжлалтай" гэдгийг хэлсэн байдаг.

Үндсэн хуульд “Төрийн байгууллага шашны, сүм хийд улс төрийн үйл ажиллагаа эрхлэн явуулж болохгүй” гэсэн заалт бий. IX дүрийн Богд Жэвзундамба хутагт өөрийн гэрээслэлдээ миний удаах дүрийг миний язгуурын багш Далай лам тодруулна, миний удаах дүр улс төрийн үйл ажиллагаанд оролцохгүй бөгөөд иш, онолын эрдэм төгөлдөр лам хувраг байна хэмээн захиж үлдээсэн байдаг.