2023-2024 оны өвөлжилтийн бэлтгэл хангах ажлын хүрээнд Нийслэлийн Агаар, орчны бохирдолтой тэмцэх газар, “Таван толгой түлш” ХХК хамтран 100,000 тонн сайжруулсан шахмал түлшний нөөцийг бүрдүүлэхээр төлөвлөжээ. 

Үүний дагуу өнөөдрийн байдлаар түрээсийн 46 агуулахад нийт 81,885 тонн түлшний нөөцийг бүрдүүлээд байгаа аж.

Есдүгээр сарын 15 гэхэд сайжруулсан түлшний нөөц бүрдүүлэлт 100 хувьд хүрнэ. Мөн сайжруулсан шахмал түлшний тээвэрлэлт хийх 31 компанитай гэрээ байгуулсан. Гэрээний дагуу 310 тээврийн хэрэгсэл үйлдвэрээс борлуулалтын цэг, үйлдвэрээс агуулах, агуулахаас борлуулалтын цэг гэсэн үндсэн гурван циклээр, өдөрт дунджаар таван удаагийн рейсээр сайжруулсан шахмал түлш тээвэрлэнэ.

“Таван толгой түлш” ХХК-ийн зүгээс 2023-2024 онд ажиллах борлуулалтын цэгийг сонгон шалгаруулахаар burtgel.ttt.mn/ цахим хаягаар материал хүлээн авч байгаа. Бүртгэл наймдугаар сарын 17-31 хүртэл үргэлжилнэ. Борлуулалтын цэг сонгон шалгаруулалтад нийт 855 хүсэлт ирсэн байна. 2023-2024 оны галлагааны улиралд сайжруулсан шахмал түлж борлуулах 655 цэг ажиллах бөгөөд борлуулагч болох хүсэлтэй иргэдийн шаардлага хангасан хүсэлт, материалыг цахим хэлбэрээр хүлээн авч сонгон шалгаруулалт хийн гэрээ байгуулж, хамтран ажиллана.

• Борлуулалтын цэг болох байршил нь Онцгой Байдлын Газрын iSUZU FTS 33HL маркийн болон түүнтэй ижил төстэй гал унтраах автомашины саадгүй орж гарах боломжтой байх. ( Автомашины хэмжээ: Урт 7.5м, өргөн 2.5м, өндөр 3.3м)
• Борлуулагч өөрийн эзэмшлийн газар, хашаа, байшинтай байх.
• Түрээсний газар бол түрээслүүлэгчийн зөвшөөрөл (сонгон шалгруултанд тэнцсэн тохиолдолд түрээсний гэрээ байгуулах.)
• Нэг өрхөөс нэг л хүсэлт, материал хүлээж авна.
• Хаяг давхацсан буюу нэг хаяг дээр амьдардаг хүмүүсийн материалыг нэг хүсэлтэд тооцно.
• Нийтийн эзэмшлийн газар дээр борлуулалтын үйл ажиллагаа явуулах тохиолдолд харьяа дүүрэг болон хорооны зөвшөөрөлтэй байх.
• Борлуулалтын үйл ажиллагаа явуулах эргэлтийн хөрөнгөтэй байх
• Борлуулалтыг “Таваттолгой Түлш ХХК”-аас тогтоосон журмын дагуу үйл ажиллагаагаа зохион байгуулах.
• Өнгөрсөн хугацаанд зөрчил гаргаагүй байх.
• Өмнө нь борлуулалтын цэг ажилуулж байсан туршлагатай бол давуу тал болно.