Улсын арслан М.Бадарч өнөө өглөө "Агаар амьсгалж, тайвшраад ирье. Үдээс хойш хэвлэлийн хурал хийнэ" гээд дасгал хийдэг Богд уул руу гарчээ. Гэвч тэрбээр машинтайгаа хэд хэдэн удаа өнхөрч, хүнд гэмтэл авсан ба одоо ГССҮТ-д эмчлүүлж байна. Биеийн байдал хүнд байгаа, ярьж чадахгүй байгаа аж.

Урьдчилсан байдлаар гартаа хоёр хугарал, нурууны хугарал, дотуур гэмтэл авсан ба нарийн шинжилгээнүүд хийгдэж байгаа юм байна.

Тэрбээр өнөөдөр (09.06) Допингийн эсрэг үндэсний төвд шалгалт оруулах, Солонгосын лабораториос ирсэн шинжилгээний хариуг ил болгохыг шаардах зэрэг хэд хэдэн асуудлаар олон нийтэд хандаж, хэвлэлийн хурал хийхээр ойрын хүмүүстэйгээ зөвлөлдөөд байжээ. Мөн өчигдөр орой сэтгэл санаа тогтворгүй байгаагаа хэлж, үүрээр ууланд гараад ирье, тэгээд хурлаа зарлая гэж утсаар ярьсан байна. Гэвч өдөр болтол утас нь холбогдохгүй байсан түүнийг эмнэлэгт хүнд байгааг ойрын хүмүүс нь мэдсэн байна.