Хятад улсын ард иргэд коронавирусын эсрэг хатуу дэглэмээс татгалзаж, өнгөрсөн ням гаригт хилээ нээсэн. Мөн ирэх сарын 21-ний өдөр болох цагаан сарын баяраар хотоос олон сая хүмүүс төрөлх нутаг орон, хөдөө рүүгээ очиж сар шинээ тэмдэглэхээр явна. Гадагшаа халдвар тархаах, болоод дотооддоо халдвар нэмэгдүүлэх эрсдэл энэ үеэр эрчимжинэ гэдгийг тус улсын Өвчний хяналт, урьдчилан сэргийлэх төвийн ахлах Зенг Гуан анхааруулжээ. Дэлхийн эрүүл мэндийн байгууллагаас мөн баярын амралтын өдрүүдээр аялахаас үүдэлтэй эрсдлийг анхааруулсан. Хятад улс COVID-ийн улмаас нас барсан тоог дарсан гэж НҮБ-ын агентлаг мэдэгдсэн боловч халдварын дэгдэлтийн талаар илүү дэлгэрэнгүй мэдээлэл өгч байгааг сайшаасан байна. Мөн АНУ-д өнгөрсөн арванхоёрдугаар сард хурдацтай тархсан Омикроны дэд хувилбар болох “XBB.1.5”-ын халдварын нэг тохиолдлыг Хятадын вирус судлаачид баасан гаригт илрүүлснээ мэдэгджээ. ДЭМБ-ын эрдэмтэд уг дэд хувилбарыг хамгийн халдварламтгай гэж тодорхойлсон. Эрүүл мэндийн байгууллагууд сүүлийн нэг сарын хугацаанд өдөрт тав буюу түүнээс цөөн хүн нас барсан тухай мэдээлсээр байгаа ч оршуулгын газруудын урт дараалал, хөл хөдөлгөөн ихтэй эмнэлгүүдээс гарч байгаа цогцосны тоотой мэдээ нь зөрч байна. Хятад улс хилээ нээснээс хойш өдөрт дунджаар 490.000 хүн хилээр орж гарч байгаа нь тахлын өмнөх үеийн дөнгөж 26 хувьтай тэнцэж байгаа юм байна.